Ադրբեջանում ձերբակալել են նախկին դիվանագետի, որը ժամանակին քննադատել էր Արցախի դեմ Բաքվի ագրեսիան

Ադրբեջանում նախօրեին ձերբակալել են նախկին դիվանագետ, ակտիվիստ Էմին Իբրահիմովին։ Այս մասին լրատվամիջոցներին հայտնել են նրա հարազատները՝ նշելով, որ Իբրահիմովը երեկոյան զանգահարել է ու հայտնել է, որ գտնվում է Նիզամիի շրջանի ոստիկանության բաժանմունքում։

Նրա փաստաբան Ագիլ Լաիջն էլ հայտնել է, որ Իբրահիմովը ձերբակալվել է Ադրբեջանի քրեական օրենսգրքի 126.1 հոդվածի հատկանիշներով (դիտավորությամբ ծանր մարմնական վնասվածք հասցնելը), որը նախատեսում է 3-ից 8 տարվա ազատազրկում։ Իբրահիմովը հերքում է այս մեղադրանքը։

Նա փաստաբանին պատմել է, որ հուլիսի 22-ի կեսօրին մետրոյի «Խալգլար Դոստլուղու» կայարանի մոտ անհայտ անձը հարձակվել է իր վրա, իսկ քաղաքացիական հագուստով  ուժայինները անմիջապես հայտնվել են դեպքի վայրում։ Նրանք Իբրահիմովին բերման են ենթարկել և տարել ոստիկանական բաժանմունք։ Նրա նկատմամբ կիրառել են էլեկտրաշոկեր, որպեսզի ստիպեն հայտնելու հեռախոսի կոդը։

ՆԳՆ մամուլի ծառայության ղեկավար Էլշադ Հաջիևը հաստատել է նախկին դիվանագետի ձերբակալումը։

«Իբրահիմովը ձերբակալվել է։ Դանակահարվածը հոսպիտալացվել է։ Կատարվում է հետաքննություն»,- ասել է  նա։

Էմին Իբրահիմովը նախկինում աշխատել է Ադրբեջանի ԱԳՆ-ում, նաև՝ ԱՄՆ-ում և Ուրուգվայում  ադրբեջանական դեսպանատանը։ Ավելի ուշ նա լքել է դիվանագիտական ​​ծառայությունը՝ Ադրբեջանի կառավարության քաղաքականության հետ անհամաձայնության պատճառով։ Սոցիալական ցանցերում նա պարբերաբար քննադատում է Իլհամ Ալիևին, Ադրբեջանի իշխանություններին վարած քաղաքականության համար, այդ թվում՝ Հայաստանի ու Արևմուտքի հետ հարաբերություններում։

Իբրահիմովը նաև ձերբակալվել էր 2023 թվականի սեպտեմբերին։ Այն ժամանակ նա դատապարտվել էր 30-օրյա վարչական կալանքի։ Նախկին դիվանագետը հայտարարել էր, որ իր ձերբակալության պատճառը սոցիալական ցանցերում քննադատական գրառումներն են։  Իբրահիմովը քննադատական գրառում էր արել նաև 2023 թ-ի սեպտեմբերի 19-ին Բաքվի կողմից Արցախի դեմ իրականացված ռազմական ագրեսիայի հետ կապված։  Նա նշել էր, որ  ԼՂ-ի վրա Բաքվի ագրեսիան իրականացվել է ռուսական շահերի շրջանակում։

Էմմա Չոբանյան