ԱՄՆ-ին և Եվրոպային ուղղված սպառնալիքները չեն անհետանա Ուկրաինայում պատերազմի ավարտով․ գեներալ Կավոլի

Որոշ բարձրաստիճան եվրոպացի դիվանագետների և Եվրոպայում ամերիկացի բարձրաստիճան գեներալի կարծիքով՝ Եվրոպային և նույնիսկ ԱՄՆ-ին սպառնացող վտանգը, ամենայն հավանականությամբ, չի վերանա Ուկրաինա Ռուսաստանի ներխուժման ավարտից հետո, գրում է VOA-ն:

Հինգշաբթի օրը Կոլորադոյում Ասպենի անվտանգության ամենամյա ֆորումի ժամանակ ելույթ ունեցող պաշտոնյաները հայտարարել են, որ Ուկրաինայում պատերազմը և Կիևին աջակցությունը էկզիստենցիալ բնույթ են կրում, սակայն Ուկրաինայի հաղթանակը ներխուժած ռուսական զորքերի նկատմամբ կլինի միայն սկիզբը:

«Արդյունքը տեղում չափազանց, չափազանց կարևոր է», – ասել է գեներալ Քրիստոֆեր Կավոլին՝ ԱՄՆ Եվրոպական հրամանատարության և Եվրոպայում ՆԱՏՕ-ի միասնակ զինված ուժերի գերագույն հրամանատարը: – Բայց մենք չպետք է պատրանքներ ունենանք։ Ուկրաինայի պատերազմի ավարտից հետո, ինչպես էլ այն ավարտվի, մենք շատ ու շատ մեծ խնդիր կունենանք Ռուսաստանի հետ»։

«Մենք կբախվենք մի իրավիճակի, երբ Ռուսաստանը կվերականգնի իր ուժերը՝ գտնվելով ՆԱՏՕ-ի սահմաններին, երբ Ռուսաստանի Դաշնությունում հիմնականում իշխանության ղեկին կլինեն նույն մարդիկ, ինչ հիմա, և երբ նրանք համոզված կլինեն, որ մենք հակառակորդներ ենք և միևնույն ժամանակ շատ-շատ զայրացած կլինեն»,- բացատրել է նա:

Գերմանիայի կանցլերի արտաքին գործերի և անվտանգության հարցերով խորհրդական Յենս Պլետները նույնքան ուղիղ կերպով հայտարարել է, որ Ռուսաստանի նախագահ Վլադիմիր Պուտինի որոշումները հանգեցրել են Ռուսաստանի հետ երկարատև, ձգձգվող հակամարտության փուլի:

«Մենք հիբրիդային ակտիվություն ենք տեսնում ողջ Եվրոպայում, – ասել է Պլետները: – Մենք հիբրիդային ակտիվություն ենք տեսնում Միացյալ Նահանգներում: Մենք տեսնում ենք, որ Ռուսաստանը ընդլայնվում է դեպի Աֆրիկա: Մենք տեսնում ենք, որ Ռուսաստանը վերականգնում է հարաբերությունները Թեհրանի կամ, ինչն ավելի վատ է, նաև Փհենյանի հետ»:

Նրա խոսքով՝ այս ամենը «մեծ պատկերի մի մասն է, որը մենք պետք է ընդունենք»:

Կավոլիի և Պլետների ելույթները հնչել են հանրապետականների ազգային համագումարի ֆոնին, որտեղ ԱՄՆ նախագահի թեկնածու Դոնալդ Թրամփի կողմնակիցները «Թրամփը կավարտի պատերազմն Ուկրաինայում» գրությամբ ցուցանակներ են բաժանել։

Սենատոր Ջեյ Դի Վենսը, որին Թրամփը ընտրել է որպես ԱՄՆ փոխնախագահի իր թեկնածու, հանդես է գալիս Ռուսաստանի և Ուկրաինայի միջև խաղաղ բանակցությունների օգտին։