Քաղաքականություն
19.07.2024 | 15:47
Թուրքիայի խորհրդարանը նախօրեին բանաձև է ընդունել, որով կոչ է արվում իր կողմից օկուպացված Հյուսիսային Կիպրոսը որպես անկախ պետություն ճանաչել․ փոխանցում են տեղական լրատվամիջոցները։
Ազգային մեծ ժողովի ընդունած բանաձևում ասվում է, որ «Կիպրոսի թուրքական պետության՝ որպես միջազգային հանրության անկախ և իրավահավասար ինքնիշխան անդամի օրինական իրավունքն այլևս չի կարող հետաձգվել»։ Բանաձևը ստացել է «Կիպրոսի խաղաղության գործողության 50-ամյակը» անունը և այն ստորագրել է Թուրքիայի Ազգային մեծ ժողովի նախագահ Նուման Քուրթուլմուշը։
Նշվում է, որ կղզում միակ և վերջնական լուծումը հնարավոր է ճանաչելով Կիպրոսի թուրք ժողովրդի անօտարելի իրավունքները և գրանցել նրանց ինքնիշխան իրավահավասարությունը և հավասար միջազգային կարգավիճակը։
«Երկու պետությունների լուծումը Միջերկրական ծովի տարածաշրջանում կայունություն և կայուն խաղաղություն ապահովելու միակ միջոցն է։ Այլևս չպետք է անտեսել երկու առանձին ժողովուրդների և երկու առանձին պետությունների գոյությունը կղզում: Կիպրոսի խնդրի լուծման փորձերը պետք է հիմնված լինեն այս իրողության վրա։ Կիպրոսի թուրքական պետության՝ որպես միջազգային հանրության անկախ և իրավահավասար ինքնիշխան անդամի արժանի ճանաչումն այլևս չի կարող հետաձգվել»,- ասվում է հայտարարության մեջ՝ հավելմամբ․
«Մենք առաջարկում ենք միջազգային հանրությանը ճանաչել կղզում իրերի իրական վիճակը, որքան հնարավոր է շուտ վերջ դնել Կիպրոսի թուրք ժողովրդի անմարդկային մեկուսացմանը և ճանաչել Հյուսիսային Կիպրոսի Թուրքական Հանրապետությունը, քանի որ այն դրան արժանի է»։
