ՌԴ հարավում երրորդ օրն անընդմեջ էլեկտրաէներգիայի անջատումներ են խոշորագույն ԱԷԿ-ում խափանումից հետո

Ռոստովի մարզը կրկին ներդրել է էներգիայի սպառման սահմանափակման ժամանակացույցեր՝ ատոմակայանում խափանումից հետո։ Այս որոշումն ընդունվել է տարածաշրջանում անոմալ շոգի և սարքավորումների ծանրաբեռնվածության վտանգի պատճառով, գրում է The Moscow Times-ը։

«Հարավային էներգահամակարգում սարքավորումների խափանումները և Ռոստովի մարզի էներգահամակարգում վթարային իրավիճակները կանխելու նպատակով օրենսդրության շրջանակներում, «Միասնական էներգահամակարգի օպերատոր» ԲԲԸ-ի հրամանով, էլեկտրաէներգիայի սպառողների ժամանակավոր անջատումների ժամանակացույց է ուժի մեջ մտել»,- հայտնում է «Դոնէրգո» ԲԲԸ Telegram ալիքը։

Տեղեկացվում է, որ Ռոստովի մարզում +39 աստիճանից բարձր շոգ է, իսկ տարածաշրջանի էներգահամակարգերը զգալի սթրեսի մեջ են։ Ընկերությունից վստահեցրել են, որ երբ էլեկտրաէներգիայի հետ կապված խնդիրները կարգավորվեն, սպառողների մատակարարումն անհապաղ կվերականգնվի։

Նովոչերկասկի վարչակազմի ղեկավար Յուրի Լիսենկոյի խոսքով՝ էլեկտրաէներգիայի մատակարարման ժամանակավոր սահմանափակում կմտցվի քաղաքի երկու թաղամասերում։ Ժամանակացույցը կներկայացվի քաղաքի Պերվոմայսկի և Արդյունաբերական թաղամասերում:
Բռնակցված Ղրիմում էլեկտրաէներգիայի հետ կապված խնդիրները շարունակվում են։

Հովհարային հոսանքազրկումները կազդեն Սիմֆերոպոլի, Յալթայի, Ալուշայի, Եվպատորիայի, Ֆեոդոսիայի, Կերչի, Սակի, Սուդակի, ինչպես նաև 14 շրջանների վրա։

Հուլիսի 16-ին Ռոստովի ատոմակայանում (ԱԷԿ) խափանումից հետո երրորդ օրն է՝ էլեկտրաէներգիայի հետ կապված լայնածավալ խնդիրները շարունակվում են։ Այն ժամանակ ավտոմատացված համակարգն անջատել էր էներգաբլոկներից մեկը՝ ատոմակայանի տուրբոգեներատորի հետ կապված խնդիրների պատճառով։

Բացի Ռոստովի մարզից և Ղրիմից, հուլիսի 17-ին և 18-ին սահմանափակումներ են մտցվել Դաղստանում, Կրասնոդարի և Ստավրոպոլի երկրամասերում և Կաբարդինո-Բալկարիայում։ Էներգետիկայի նախարարության ղեկավարի տեղակալ Եվգենի Գրաբչակի խոսքով՝ ատոմակայանում տեղի ունեցած վթարից հետո Ռուսաստանի հարավային շրջաններում շուրջ 2,5 միլիոն մարդ մնացել է առանց էլեկտրականության։ Կատարվածի պատճառները թվարկելիս փոխնախարարը նշել է գեներացիայի անբավարար ծավալը, հարևան մարզերից հոսքի ավելացման անհրաժեշտությունը և ցանցերի գերբեռնվածությունը։

Ռոստովի ԱԷԿ-ը գտնվում է Վոլգոդոնսկի մոտ։ Այն բաղկացած է չորս էներգաբլոկից։ Սա երկրի հարավում ամենամեծ կայանն է, դրա հզորությունը 4 ԳՎտ է։ Օբյեկտը Ռուսաստանում արտադրության առումով եռյակում է և էլեկտրաէներգիա է մատակարարում ավելի քան 26 միլիոն բնակչություն ունեցող հարավային շրջաններին և Հյուսիսային Կովկասին: Ատոմակայանի երրորդ էներգաբլոկը պլանային սպասարկման է հանձնվել հունիսի 22-ին։ Թիվ 2 և 4 էներգաբլոկները նորմալ աշխատում են 1700 ՄՎտ հզորությամբ: