ՏՏ համակարգերի գլոբալ խափանումը խաթարել է բանկերի, ԶԼՄ-ների և ավիաընկերությունների աշխատանքն ամբողջ աշխարհում

Ամբողջ աշխարհից տեղեկություններ են ստացվում ավիաընկերությունների, բանկերի և առաջատար լրատվամիջոցների շահագործման համար օգտագործվող համակարգչային համակարգերի համատարած խափանումների մասին, փոխանցում է BBC-ի ռուսական ծառայությունը:

Ծրագրային անսարքությունների պատճառով ավիաընկերությունները և օդանավակայանները զանգվածաբար չեղարկում են թռիչքները, իսկ արդեն իսկ թռիչքի մեջ գտնվողները արտակարգ վայրէջքի համար տեղ են փնտրում։

ՏՏ համակարգերի աշխատանքի մասսայական խափանումների պատճառները դեռ պարզված չեն, սակայն Microsoft-ը հայտարարել է, որ միջոցներ է ձեռնարկում հետևանքները մեղմելու համար։

Մեծ Բրիտանիայի երկաթուղային ընկերությունները ևս հայտարարել են, որ բախվում են «ՏՏ ոլորտում լայնածավալ մարտահրավերների հետ»:
Sky News-ը ստիպված է եղել ընդհատել ուղիղ հեռարձակումը։ Խափանումներ են նկատվում նաև Լոնդոնի ֆոնդային բորսայում։

Microsoft-ի տվյալներով՝ ՏՏ համակարգերում առաջին խափանումները սկսվել են նախօրեին՝ հինգշաբթի օրը, արևելյան ժամանակով 18:00-ի սահմաններում (22:00 GMT):

Այժմ ընկերության ինժեներները հետաքննում են ԱՄՆ-ում ամպային պահեստավորման ծառայությունների հետ կապված խնդիրները, ինչպես նաև Microsoft-ի մի քանի հավելվածների և ծառայությունների աշխատանքի խափանումները։

Դատելով ստացվող տեղեկություններից՝ Ավստրալիան խափանումից ամենաշատ տուժած երկրներից մեկն է։ Այնտեղ զանգվածաբար խափանվել են ոչ միայն օդանավակայանների, այլեւ խանութների ու հեռահաղորդակցության ընկերությունների աշխատանքը։