14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Թել Ավիվում ԱՄՆ դեսպանատան մոտ ԱԹՍ է պայթել․ մեկ մարդ զոհվել է, ութը՝ վիրավորվել
Քաղաքականություն
19.07.2024 | 14:09
Իսրայելի Թել Ավիվ քաղաքի կենտրոնում՝ ԱՄՆ դեսպանատան մոտ, գիշերը անօդաչու թռչող սարք է պայթել, ինչի հետևանքով 50-ամյա տղամարդ է զոհվել, ևս ութը վիրավորվել են։ Այս մասին հայտնում են շտապօգնության ծառայությունից, գրում է Current time-ը։
Իսրայելի պաշտպանության բանակի տվյալներով՝ անօդաչու թռչող սարքը բախվել է բնակարաններից մեկին առավոտյան ժամը 03:12-ին։ Երկրի ռազմաօդային ուժերը ուժեղացրել են օդային պարեկությունը՝ Իսրայելի օդային տարածքը պաշտպանելու համար։
Թել Ավիվի քաղաքապետ Ռոն Հուլդայը հայտարարել է, որ քաղաքային իշխանությունները բարձր զգոնության վրա են։
«Մենք պատրաստ ենք զարգացումների, եթե այդպիսիք լինեն»,-ասել է նա։
Հարձակման պատասխանատվությունը ստանձնել են Եմենի հութիները։ Նրանք պնդում են, որ գործարկել են «Յաֆֆո» նոր անօդաչու թռչող սարքը, որն ունակ է խուսափել իսրայելական ռադարների հայտնաբերման համակարգերից: Իսրայելի բանակն էլ հայտարարել է, որ դա մեծ, հեռահար անօդաչու թռչող սարք է, որը ճանաչվել է հակաօդային պաշտպանության կողմից, սակայն չի խոցվել մարդկային սխալի պատճառով:
Հութիների ներկայացուցիչն ասել է, որ Թել Ավիվը մնում է խմբավորման գլխավոր թիրախը՝ իրենց զենքերի «հասանելիության սահմաններում»։
