22.11.2024 | 14:04
Բաքուն ՀՀ-ի հետ սահմանազատված գյուղերում հսկման տեսախցիկներ է տեղադրել
«Անհրաժեշտ է, որ փոփոխվեն ՀՀ Սահմանադրության մեջ Ադրբեջանի տարածքային ամբողջականության նկատմամբ պահանջներ պարունակող դրույթները»․ Ալիևը ՝ Շոլցին
Քաղաքականություն
19.07.2024 | 11:54
Ադրբեջանի նախագահ Իլհամ Ալիևը նախօրեին Մեծ Բրիտանիայում անցկացվող Եվրոպական քաղաքական համայնքի գագաթնաժողովի շրջանակներում հանդիպել է Գերմանիայի կանցլեր Օլաֆ Շոլցին։
Ադրբեջանական կողմի փոխանցմամբ՝ Շոլցը նշել է, որ աջակցում է Հայաստանի և Ադրբեջանի միջև խաղաղության օրակարգին։ Ընդգծվել է Մյունխենի անվտանգության համաժողովի շրջանակներում Գերմանիայի կանցլերի նախաձեռնությամբ տեղի ունեցած՝ կանցլեր Օլաֆ Շոլցի և ՀՀ վարչապետ Նիկոլ Փաշինյանի հետ Ադրբեջանի նախագահի համատեղ հանդիպման կարևորությունը։
Դրանից հետո էլ Գերմանիայի աջակցությամբ կայացել է Ադրբեջանի և Հայաստանի արտգործնախարարների հանդիպումը։
Ալիևը նշել է սահմանների սահմանազատման և սահմանագծման ոլորտում ձեռք բերված հաջողությունները՝ որպես Հայաստանի և Ադրբեջանի միջև բանակցային գործընթացի անբաժանելի մաս, տեղեկացրել սահմանազատման գործընթացին վերաբերող փաստաթղթերի հաստատման մասին և ասել, որ գործընթացը շարունակվելու է այդ գծով:
«Նախագահ Իլհամ Ալիևը նշել է, որ Ադրբեջանն աջակցում է խաղաղության օրակարգին, խաղաղության պայմանագրի շուտափույթ ստորագրմանը և խաղաղության գործընթացին։ Սակայն դրա համար առաջին հերթին անհրաժեշտ է, որ Հայաստանի Սահմանադրության մեջ փոփոխվեն Ադրբեջանի տարածքային ամբողջականության նկատմամբ պահանջներ պարունակող և Հայաստանին Ադրբեջանի Ղարաբաղի շրջանի միացումը նախատեսող դրույթները, Հայաստանի տարածքային պահանջներին Ադրբեջանի նկատմամբ պետք է վերջ դրվի սահմանադրական հիմունքներով»,- ասվում է հայտարարության մեջ։
Նշվել է, որ այդ հարցերը քննարկվել են Վաշինգտոնում ԱՄՆ պետքարտուղար Էնթոնի Բլինքենի աջակցությամբ տեղի ունեցած Ադրբեջանի և Հայաստանի արտգործնախարարների հանդիպմանը։
Շոլցի հետ հանդիպմանը քննարկվել է նաև COP29-ի նախապատրաստման գործընթացը։ Ադրբեջանի և Գերմանիայի միջև համագործակցությունն այս ոլորտում, ինչպես նաև Ադրբեջանի ներդրումը Եվրոպայի էներգետիկ անվտանգության գործում կողմերը բարձր են գնահատել։
Մտքերի փոխանակություն է տեղի ունեցել Գերմանիայի և Ադրբեջանի երկկողմ հարաբերությունների տարբեր ասպեկտների շուրջ, քննարկվել են փոխադարձ հետաքրքրություն ներկայացնող հարցեր։
