Մոսկվան հույս ունի, որ «Հարավային Կովկասի երկրները հասկանում են՝ ինչ կարժենա Արևմուտքի կեղծ ընկերությունը»․ Զախարովա․ ՏԵՍԱՆՅՈՒԹ

ԱՄՆ-ը Հարավային Կովկասը դիտարկում է բացառապես որպես Ռուսաստանի դեմ ուղղված տարբեր տեսակի գործողությունների և այնտեղ գտնվող երկրների ու ժողովուրդների խաղաղ գոյակցության դեմ ցատկահարթակ։ Այս մասին իր ամենշաբաթյա ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

Նա նշել է, թե Մոսկվան հույս ունի, որ «Հարավային Կովկասի երկրները հասկանում են, թե ինչ կարժենա Արևմուտքի կեղծ ընկերությունը»։

ՌԴ ԱԳՆ պաշտոնական ներկայացուցչի խոսքով՝ տարածաշրջանում խաղաղության և կայունության հասնելը, «ինչը հնարավոր է միայն Կովկասի երկրների միջև հարաբերությունների համապարփակ կարգավորմամբ՝ նրանց անմիջական հարևանների՝ Իրանի, Թուրքիայի, Ռուսաստանի մասնակցությամբ, չի մտնում Վաշինգտոնի նպատակների և խնդիրների մեջ»։

«Ի թիվս այլ բաների՝ մենք տեսնում ենք ամերիկացիների կողմից Վրաստանում իրավիճակը սրելու փորձեր հոկտեմբերին նշանակված խորհրդարանական ընտրությունների համատեքստում։ Եվ այս ամենը վերաբերում է ոչ միայն Վրաստանին, այլև Ադրբեջանին, Հայաստանին։ Մենք տեսնում ենք, թե ինչպես են ամերիկացի պաշտոնյաները բառացիորեն անվերջանալի շարքով ձգվում դեպի Երևան։ Ի՞նչ է դա։ Դա պատրանք է ստեղծում, որ նրանք մտածում են այս երկրի և նրա ժողովրդի բարօրության մասին: Իրականում հետխորհրդային տարածքի երկրները ներքաշվում են հակառուսական արշավների և հակառուսական ծրագրերի մեջ։ Սա վնաս է պատճառում ոչ այնքան մեզ, որքան հենց այս պետություններին՝ նրանց տնտեսական գործունեությանը, մարդասիրական քաղաքականությանը և հսկայական թվով կոնկրետ մարդկանց: Հուսով ենք, որ Հարավային Կովկասի մեր գործընկերները հասկանում են, թե դա ինչ արժե, կամ ավելի լավ է ասել, թե ինչ կարժենա Արևմուտքի հետ նման կեղծ բարեկամությունը»,- հայտարարել է ՌԴ ԱԳՆ պաշտոնական ներկայացուցիչը։

Մանրամասները՝ տեսանյութում։