Ապագայում մեզ անհրաժեշտ են զինաթափման վերաբերյալ համաձայնագրեր ՌԴ-ի հետ․ Շոլց

Ռուսաստանի հետ Արևմուտքի հարաբերությունները մոտ ապագայում, ամենայն հավանականությամբ, կորոշվեն զսպման քաղաքականությամբ, սակայն երկարաժամկետ հեռանկարում անհրաժեշտ է կրկին զինաթափման պայմանագրեր կնքել Ռուսաստանի հետ։ Այս մասին հայտարարել է Գերմանիայի կանցլեր Օլաֆ Շոլցը ARD հեռուստատեսությանը տված հարցազրույցում պատասխանելով հարցին՝ արդյո՞ք ըմբռնումով է վերաբերվում այն հանգամանքին, որ գերմանացիները կրկին վախենում են Սառը պատերազմից, փոխանցում է DW-ի ռուսական ծառայությունը։

«Այն ամենը, ինչ մենք անում ենք, պետք է բերի նրան, որ մեզ համար նորից գա ժամանակը, երբ կարող ենք խոսել աշխարհի առաջատար տերությունների միջև սպառազինությունների վերահսկման մասին, նույնիսկ եթե այս անգամ, ինչպես երևում է, դեռ շատ հեռու է»,- ասել է Գերմանիայի կանցլերը։

Նա նշել է, որ Ռուսաստանը դուրս է եկել «զինաթափման բոլոր համաձայնագրերից», և Գերմանիան «պետք է արձագանքի դրան»։

«Դրա համար մենք պետք է այնքան ուժեղ լինենք, որ ոչ ոք մեզ վրա չհարձակվի»,- ասել է պաշտոնյան։

Հարցազրույցում շոշափվել է նաև 2025 թվականի Գերմանիայի դաշնային բյուջեի թեման։ Reuters-ը, որը ծանոթացել  է փաստաթղթի նախագծին, գրել էր, որ այն նախատեսում է Ուկրաինային ռազմական աջակցության ծախսերի կրկնակի կրճատում՝ 8-ից մինչև 4 միլիարդ եվրոյի։ Ավելի վաղ էլ հաղորդվել էր, որ հուլիսի 5-ի գիշերը Դաշնային կանցլերի աշխատակազմում երկարատև խորհրդակցություններից և իշխող կուսակցությունների մակարդակով դրանց նախորդող ամիսների քննարկումներից հետո Օլաֆ Շոլցը, ֆինանսների նախարար Քրիստիան Լինդները և էկոնոմիկայի նախարար Ռոբերտ Հաբեկը համաձայնության են եկել 2025 թվականի դաշնային բյուջեի և մինչև 2028 թվականն ընկած ժամանակահատվածի կառավարության ֆինանսական ծրագրի վերաբերյալ։

Ըստ այդ համաձայնության՝ Գերմանիայի պաշտպանության բյուջեն հաջորդ տարի կաճի 1,2 միլիարդ եվրոյով՝ ներկայիս 52 միլիարդ եվրոյից հասնելով 53,2 միլիարդ եվրոյի։ Սա զգալիորեն պակաս է Գերմանիայի պաշտպանության նախարար Բորիս Պիստորիուսի պահանջած 6 միլիարդ եվրոյի լրացուցիչ ֆինանսավորումից։ Միաժամանակ, ըստ ԶԼՄ-ների, 2025 թվականի Գերմանիայի դաշնային բյուջեում «անցք» կա եկամուտների և ծախսերի միջև՝ 17 միլիարդ եվրոյի չափով։

Հարցին, թե կոնկրետ ինչպե՞ս է իր կառավարությունը մտադիր «կարկատել այդ անցքը», Շոլցը խուսափողական պատասխան է տվել՝ նշելով ներդրումների ֆինանսավորումը։

«Կապրենք, կտեսնենք»,- այսպես են նրա պատասխանի էությունը փոխանցել լրագրողները։

ARD-ի խնդրանքով պատմելով ամառվա իր ամենամեծ ցանկության մասին՝ կանցլերն ասել է. «Որ Ռուսաստանը դադարեցնի Ուկրաինայի դեմ պատերազմը: Բայց, բացի այդ, ես ինձ և բոլորին մաղթում եմ, որ նրանք պարզապես հանգստանան ամառվա ընթացքում»։