Եվրախորհրդարանը նոր բանաձևով վերահաստատել է իր աջակցությունն Ուկրաինային և դատապարտել Օրբանի այցը ՌԴ

Մինչ Ուկրաինայի դեմ Ռուսաստանի պատերազմը շարունակվում է, Եվրախորհրդարանը նոր բանաձևով վերահաստատել է իր դիրքորոշումը, որ ԵՄ-ն պետք է շարունակի աջակցել Կիևին այնքան ժամանակ, որքան անհրաժեշտ է մինչև հաղթանակը:

Բանաձևը, որը սահմանում է նորընտիր Եվրախորհրդարանի առաջին պաշտոնական դիրքորոշումն Ուկրաինայի դեմ Ռուսաստանի ագրեսիայի վերաբերյալ, վերահաստատում է Եվրախորհրդարանի պատգամավորների շարունակական աջակցությունն Ուկրաինայի անկախությանը, ինքնիշխանությանը և տարածքային ամբողջականությանը՝ միջազգայնորեն ճանաչված սահմաններում։ Այն կոչ է անում ԵՄ-ին պահպանել և ընդլայնել Ռուսաստանի ու Բելառուսի դեմ պատժամիջոցների քաղաքականությունը, վերահսկել և վերանայել դրա արդյունավետությունն ու ազդեցությունը և համակարգված կերպով լուծել ԵՄ-ում գործող ընկերությունների, երրորդ կողմերի կողմից պատժամիջոցների շրջանցման հարցը:

Վերահաստատելով իրենց հաստատակամ համոզմունքը, որ Ռուսաստանը պետք է ֆինանսապես փոխհատուցի Ուկրաինայում իր պատճառած ավերածությունների համար, Եվրախորհրդարանի պատգամավորները ողջունում են ԵՄ-ի վերջին ջանքերը՝ ռուսական սառեցված ակտիվներից ստացվող եկամուտներն ուղղելու ուկրաինական պատերազմին աջակցելու համար: Նրանք նաև ցանկանում են իրավական ռեժիմ սահմանել ԵՄ-ի կողմից սառեցված ռուսական պետական ​​ակտիվների բռնագրավման համար։

Պատգամավորները նաև ողջունում են ՆԱՏՕ-ի վերջին գագաթնաժողովի արդյունքները և վերահաստատում դիրքորոշումն առ այն, որ Ուկրաինան գտնվում է ՆԱՏՕ-ին անդամակցելու անշրջելի ճանապարհի վրա: Նրանք նաև կոչ են անում ԵՄ-ին և անդամ երկրներին՝ մեծացնել իրենց ռազմական աջակցությունն Ուկրաինային այնքան ժամանակ, որքան անհրաժեշտ է, և ցանկացած ձևով, որն անհրաժեշտ է:

Խորհրդարանը դատապարտում է նաև Ռուսաստանի բարբարոսական հրթիռային հարձակումը Կիևում մանկական հիվանդանոցի վրա և Հունգարիայի վարչապետ Վիկտոր Օրբանի վերջին այցը Ռուսաստան, որը չի ներկայացնում ԵՄ-ն և հանդիսանում է ԵՄ պայմանագրերի և ընդհանուր արտաքին քաղաքականության բացահայտ խախտում։ Փաստաթղթում ասվում է, որ Հունգարիան պետք է բախվի այդ գործողությունների հետևանքների: Հաշվի առնելով, որ Հունգարիայի վարչապետի, այսպես կոչված, «խաղաղության առաքելությանն» անմիջապես հաջորդել է  մանկական հիվանդանոցի հարձակումը, նշվում է, որ սա ցույց է տալիս Օրբանի ենթադրյալ խաղաղության ջանքերի «անտեղիությունը»:

Բանաձևն ընդունվել է 495 կողմ, 137 դեմ և 47 ձեռնպահ ձայներով։