07.10.2026 | 19:12
Թուրքական նավերի վրա հարձակումներից հետո Էրդողանը Պուտինի հետ Սև ծովում անվտանգության հարցն է քննարկել
ՀԴԲ-ն դեռ չի պարզել Թրամփի վրա կրակողի դրդապատճառները. AP
Քաղաքականություն
17.07.2024 | 17:04
ԱՄՆ Հետաքննությունների դաշնային բյուրոն (ՀԴԲ) նախկին նախագահ Դոնալդ Թրամփի դեմ մահափորձի հետաքննության շրջանակում արդեն հարցազրույց է անցկացրել ավելի քան 100 մարդու հետ։ Կրակողի շարժառիթը դեռևս պարզված չէ, հայտնում է Associated Press-ը։
Գործակալության տվյալներով՝ ՀԴԲ-ի գործակալները մուտք են գործել հրաձիգ Թոմաս Մեթյու Քրուքսի բջջային հեռախոս և ստուգել նրա համակարգչի, տան և մեքենայի պարունակությունը։ Համադասարանցիները նրան բնութագրել են որպես խելացի, բայց ինքնամփոփ մարդու՝ նշելով, որ նա հաճախ ականջակալներով էր և միայնակ էր ճաշում: Նրանցից մեկի խոսքով՝ դպրոցում երիտասարդը հետապնդվել է արտաքին տեսքի պատճառով։
AP-ն նշում է, որ անորոշ են նաև կրակողի քաղաքական հայացքները։ Մասնավորապես, նա 15 դոլար է նվիրաբերել Դեմոկրատական կուսակցությանը Ջո Բայդենի երդմնակալության օրը, թեև Փենսիլվանիայում գրանցված է եղել որպես հանրապետական։ Ոստիկանները սոցցանցերում չեն գտել նաև ինքնասպանության գրություն կամ հաղորդագրություններ, որոնք կարող են բացատրել նրա արարքի պատճառը։
Թրամփի դեմ մահափորձն իրականացվել է հուլիսի 13-ին Փենսիլվանիայում նախընտրական հանրահավաքի ժամանակ։ Գնդակը վնասել է նրա աջ ականջը։ Հրաձգության հետևանքով զոհվել է հանրահավաքի մասնակիցներից մեկը, ևս երկուսը վիրավորվել են։
Թոմաս Մեթյու Քրուքսը գնդակահարվել է Գաղտնի ծառայության աշխատակիցների կողմից։
