Ռուսական կամիկաձե անօդաչուն Բելառուսի տարածք է թռել ու պայթել․ ԶԼՄ-ներ

Ռուսական կամիկաձե անօդաչու թռչող սարքը Բելառուսի տարածք է թռել ու պայթել Գոմելի շրջանում։ Այս մասին հայտնել է «Беларускі Гаюн» մոնիթորինգային խումբը, փոխանցում է Meduza-ն։

Դիտորդների տվյալներով՝ «Շահեդ» տիպի անօդաչու թռչող սարքը հուլիսի 16-ի առավոտյան ընկել է Օկտյաբրսկի շրջանում՝ Պարիչի  և Լյուբան գյուղերի միջև՝ Բոբրույսկից մոտավորապես 55 կիլոմետր և Ուկրաինայի հետ սահմանից 120 կիլոմետր հեռավորության վրա։ ԱԹՍ-ի պայթյունը հաստատում է, որ այն չի եղել ուսումնական ու հետախուզական, այլ նախատեսված է եղել Ուկրաինայի տարածքի վրա հարձակման համար։

Դիտորդական խմբի զեկույցների համաձայն՝ վերջին շաբաթվա ընթացքում առնվազն չորս ռուսական անօդաչու թռչող սարքեր են մտել Բելառուս։ Հուլիսի 11-ի երեկոյան Ուկրաինայի վրա ռուսական հերթական հարձակման ժամանակ Գոմելի շրջանի Լոև գյուղի մոտ ռուսական անօդաչու թռչող սարք է նկատվել։

Հուլիսի 13-ի գիշերը մեկ անօդաչու թռչող սարք բելառուսա-ուկրաինական սահմանով Գոմելի շրջանում մտել է Բելառուսի օդային տարածք և երեք ժամ թռել Վիտեբսկի ուղղությամբ՝ անցնելով 350 կիլոմետր։

Բելառուսական ավիացիան օդ է բարձրացել՝ անօդաչու սարքերը որսալու համար։

Հուլիսի 16-ի գիշերն էլ ռուսական մեկ այլ անօդաչու թռչող սարք 60 կիլոմետր թռիչք է կատարել Բելառուսի օդային տարածքում։ Չորրորդ անօդաչու թռչող սարքը նկատվել է հուլիսի 16-ի առավոտյան։ Միաժամանակ, Բելառուսի ռազմաօդային ուժերի Սու-30 կործանիչն ու Մի-24 ուղղաթիռը թռել են Գոմելի և Մոգիլևի շրջանների վրայով։