30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Գազայի կենտրոնական և հարավային հատվածներում գնդակոծությունների հետևանքով տասնյակ զոհեր կան
Քաղաքականություն
17.07.2024 | 14:27
Գազայի հատվածի հարավային և կենտրոնական շրջաններում իսրայելական ավիահարվածների հետևանքով զոհվել է շուրջ 60 մարդ, հայտնել են ՀԱՄԱՍ-ի կողմից վերահսկվող պաղեստինյան գործակալությունների ներկայացուցիչները: Զոհերի թվի անկախ հաստատում դեռևս չկա։
Իսրայելը հայտնում է, որ փորձում է ոչնչացնել ՀԱՄԱՍ-ի զինյալներին, որոնք գտնվում են խիտ բնակեցված տարածքներում, փոխանցում է VOA-ն:
Հաղորդվում է, որ Իսրայելի ռազմաօդային ուժերը խոցել են մոտ 40 թիրախ, ներառյալ՝ ռազմական ենթակառուցվածքները և շենքեր, որոնցում եղել են պայթուցիկ նյութեր:
ՀԱՄԱՍ-ը մեղադրել է Իսրայելին հարձակումների էսկալացիայի մեջ՝ ԱՄՆ-ի կողմից սահմանված հրադադարը խաթարելու համար: Իր հերթին, Իսրայելը պնդում է, որ հարձակումներն ուղղված են ՀԱՄԱՍ-ի զինյալներին վերացնելուն։
Գազայի առողջապահական ոլորտի պատասխանատուները հայտնել են հինգ պաղեստինցիների դիերի հայտնաբերման մասին այն բանից հետո, երբ իսրայելական ավիահարվածը թիրախավորել է ալ-Մաղազի փախստականների ճամբարում գտնվող տները: Եվս երեք մարդ է զոհվել Դեյր ալ-Բալահ քաղաքի վրա ավիահարվածի հետևանքով։
Երկուշաբթի իսրայելական ավիահարվածի հետևանքով զոհվել էր նաև սիրիացի գործարար Մուհամեդ Բարաա Քաթերջին, որը սերտորեն կապված էր Սիրիայի նախագահ Բաշար ալ-Ասադի և նրա վարչակարգի հետ: Նա ԱՄՆ պատժամիջոցների տակ էր՝ Ասադի ռեժիմի և արմատական «Իսլամական պետություն» խմբավորման միջև առևտուրը հեշտացնելու համար:
Բացի այդ, իսրայելցի պաշտոնյաները երեքշաբթի հայտարարել են, որ կսկսեն ծանուցագրեր տալ ծայրահեղ ուղղափառ հրեաներին՝ մասնակցելու Գազայի պատերազմին: Նրանք զորակոչի ենթակա չեն եղել մինչև Իսրայելի Գերագույն դատարանի հունիսի որոշումը: Ակնկալվում է, որ որոշումը որոշակի լարվածություն կառաջացնի երկրում, քանի որ նախկինում նմանատիպ նախագծերի փորձերը հանգեցրել են բողոքի ցույցերի:
