ՌԴ հարավում էլեկտրաէներգիայի հովհարային անջատումներ են խոշորագույն ատոմակայանի խափանումից հետո

Դոնի Ռոստովում, Կաբարդինո-Բալկարիայում, Ստավրոպոլում և բռնակցված Ղրիմում հովհարային անջատումներ են սկսվել Ռոստովի ատոմային էլեկտրակայանի (ԱԷԿ) աշխատանքում խափանման պատճառով, փոխանցում է The Moscow Times-ը։

Ռոստովի մի քանի շրջաններ հայտնվել են էլեկտրաէներգիայի ժամանակավոր անջատումների գոտում, իսկ քաղաքի կենտրոնն ու Ալեքսանդրովսկայան ընդհանրապես մնացել են առանց հոսանքի։ Քաղաքի արևմտյան մասում էներգետիկները սկսել են բաժանորդներին միացնել ցանցին, ասել է քաղաքային վարչակազմի ղեկավար Ալեքսեյ Լոգվինենկոն։

Ստավրոպոլի երկրամասի ղեկավար Վլադիմիր Վլադիմիրովի տեղեկացմամբ՝ տարածաշրջանը ժամանակավորապես սահմանափակել է սպառումը 140 մեգավատով։ Բաժանորդների անջատումներ արդեն տեղի են ունեցել մի քանի տարածքներում։

Կաբարդինո-Բալկարիայի Հանրապետությունում առանց էլեկտրաէներգիայի են մնացել շրջանի մայրաքաղաք Նալչիկը և մի շարք այլ բնակավայրեր։

«Ժամանակավոր հոսանքազրկումներ են նաև մեր հանրապետությունում։ Այն մասամբ է՝ Նալչիկ քաղաքը, Բակսանսկի, Զոլսկի, Լեսկենսկի, Մայսկի, Պրոխլադնենսկի և Չեգեմսկի շրջանների որոշ բնակավայրեր»,- Telegram-ալիքում գրել է Կաբարդինո-Բալկարիայի ղեկավար Կազբեկ Կոկովը։

Նրա խոսքով՝ էներգետիկները վերացնում են անջատումների պատճառը։

Առանց էլեկտրականության է մնացել նաև գրեթե ամբողջ Ղրիմը։ «ՂրիմԷներգո»-ն նշել է, որ էլեկտրահաղորդման գծերի անջատումն անհրաժեշտ միջոց է, սակայն անհրաժեշտ է նվազագույնի հասցնել ցանցային սարքավորումների ծանրաբեռնվածությունը։ Անջատումներից տուժել են Սուդակը, Յալթան, Ալուշտան, Թեոդոսիան և Կերչը և մի շարք այլ բնակավայրեր։ Սիմֆերոպոլում և Սիմֆերոպոլի մարզում էլեկտրաէներգիայի պլանային անջատումներ են։

Դաղստանի էներգետիկայի նախարարության տվյալներով՝ շրջանի մի շարք բնակավայրեր նույնպես մասամբ հոսանքազրկված են։

Կրասնոդարում 100-ից ավելի էլեկտրաէներգիայի ենթակայաններ շարքից դուրս են եկել, մոտ 100 փողոց հոսանքազրկվել է հուլիսի 16-ի ցերեկը։ Հիմնական անջատումները տեղի են ունեցել Կուբանի և Արևմտյան շրջաններում։ Քաղաքում կանգ են առել տրամվայներն ու տրոլեյբուսները։

Հիշեցնենք, որ ավելի վաղ « Ռոսատոմի» մամուլի ծառայությունը հայտնել էր, որ ավտոմատացված համակարգն անջատել է էներգաբլոկներից մեկը՝ «Ռոստովի» ԱԷԿ-ում տուրբինագեներատորի հետ կապված խնդիրների պատճառով։