09.09.2026 | 21:30
Պապիկյանը պաշտոնանկ է արել Ճամբարակի զորամասի հրամանատարին
Իրանը հերքել է Թրամփի դեմ մահափորձ կազմակերպելու մասին պնդումները
Քաղաքականություն
17.07.2024 | 11:09
ՄԱԿ-ում Իրանի առաքելությունը հերքել է CNN-ի տարածած տեղեկությունը, որն Իրանին մեղադրել է ԱՄՆ նախկին նախագահ Դոնալդ Թրամփի դեմ մահափորձին ներգրավվածության մեջ՝ այդ մեղադրանքներն անվանելով «անհիմն» և «քաղաքականապես մոտիվացված», գրում է Mehr գործակալությունը։
ՄԱԿ-ում Իրանի առաքելությունը հայտարարել է, որ Թերանի տեսանկյունից՝ Դոնալդ Թրամփը հանցագործ է, որը պետք է պատժվի դատարանում և դատապարտվի՝ 2020 թվականի սկզբին Իրաքում Իսլամական հեղափոխության պահապանների կորպուսի «Քուդս» ուժերի հանգուցյալ հրամանատար գեներալ Ղասեմ Սոլեյմանիի սպանությունը պատվիրելու համար։
Նշվում է, սակայն, որ Իրանն ընտրել է ԱՄՆ նախկին նախագահին պատասխանատվության ենթարկելու իրավական ճանապարհը։
CNN-ը, վկայակոչելով իր աղբյուրներին, հայտնել է, որ ԱՄՆ իշխանությունները վերջին շաբաթներին ստացել են հետախուզական տվյալներ, որոնք վկայում են ԱՄՆ նախագահի թեկնածու Դոնալդ Թրամփի դեմ Իրանի կողմից դավադրության մասին:
Ըստ հեռուստալիքի աղբյուրների՝ ԱՄՆ Գաղտնի ծառայությունը Թրամփի քարոզարշավի շտաբին տեղեկացրել է սպառնալիքի մասին և ուժեղացրել քաղաքական գործչի անվտանգության միջոցառումները դեռևս հուլիսի 13-ից առաջ՝ այն օրը, երբ Թրամփը վիրավորվել է Փենսիլվանիայի հանրահավաքի ժամանակ իրեն ուղղված կրակոցից։ Սակայն, ըստ հրապարակման, որևէ նշան չկա, որ Թրամփի ուղղությամբ կրակած Թոմաս Մեթյու Քրուքսը որևէ կերպ մասնակից է իրանական դավադրությանը։
