ՀՀ ԱԻՆ աշխատակցի օրվան նվիրված տոնական շքերթ՝ նախարարության շարահրապարակում

ՀՀ ԱԻՆ փողային նվագախումբն ազդարարեց շքերթի սկիզբը: ՀՀ ԱԻՆ փրկարար ծառայության տնօրեն, փ/ծ գնդապետ Արտակ Նահապետյանի հրամանատարությամբ շքերթի մասնակիցները դուրս եկան «Հանդիսավոր երթի»:

Հրապարակով անցան ՀՀ ԱԻՆ ՓԾ կառուցվածքային ստորաբաժանումների աշխատակիցները՝ Հայ-ռուսական մարդասիրական արձագանքման կենտրոնի, քաղաքացիական պաշտպանության ստորաբաժանումների, Հատուկ նշանակության փրկարարական աշխատանքների իրականացման կենտրոնի, ՀԱԷԿ հատուկ հրշեջ ջոկատի, Արցախի Հանրապետություն ԿԱ արտակարգ իրավիճակների պետական ծառայության, Երևան քաղաքի փրկարարական վարչության հրշեջ-փրկարարական ջոկատների, ինչպես նաև՝ ՀՀ ԱԻՆ մարզային փրկարարական վարչությունների և սայլակավոր հաշմանդամ աշխատակիցների շարասյուները:

Ողջույնի և շնորհավորանքի խոսքով հանդես եկավ ՀՀ ԱԻ նախարար Հ. Ռոստոմյանը.

– Ես հպարտ եմ, որ մենք այսպիսի թիմ ունենք՝ ուժեղ, հզոր, բազմաքանակ ու պրոֆեսիոնալ: Եվ միայն իրար հետ, կյանքի ենք կոչում գործուն ու կարողունակ արտակարգ իրավիճակների նախարարության տեսլականը, որը համահունչ է մեր երկրի կարիքներին, որը համաքայլ է համաշխարհային զարգացումներին, որը համագործակցելի է աշխարհի զորեղների հետ, որին սիրում, հավատում ու վստահում է մեր ժողովուրդը, ասաց Հ. Ռոստոմյանը:

Ողջունելով միջոցառման մասնակիցներին և շնորհավորելով ԱԻՆ աշխատակցի օրվա կապակցությամբ՝ վարչապետ Ն. Փաշինյանը նրանց ցանկացավ հնարավորինս քիչ աշխատանք և հնարավորինս մեծ բարեկեցություն։ Վարչապետի խոսքով՝ արտակարգ իրավիճակների աշխատողները շատ կարևոր դերակատարում ունեն հասարակության կյանքում։ Նա ասաց, որ երկրում արտակարգ իրավիճակներն ընդհանրապես բացառելն անհնար է, որովհետև, ինչպես վիճակագրությունն է ցույց տալիս, մարդիկ արտակարգ իրավիճակ են գնահատում նույնիսկ այն, երբ սիրելի կատուն բարձրանում է տանիք և չի կարողանում իջնել: Փաշինյանը շեշտեց, որ համազգեստավոր ցանկացած ծառայություն պետք է զերծ մնա քաղաքական որևէ գործունեությունից.

– Ցանկանում եմ՝ ևս մեկ անգամ արձանագրենք, որ որևէ կերպ չի կարելի քաղաքական որևէ գործունեության մեջ ներքաշվել, վտանգել, ստվերել հարազատի այն զգացողությունը, որ ՀՀ յուրաքանչյուր քաղաքացի պետք է ունենա ՀՀ զինվորական համազգեստ կրող ցանկացած անձի նկատմամբ, – ասաց ՀՀ վարչապետը։

Վարչապետը նկատեց՝ արտակարգ իրավիճակների համակարգում բազմաթիվ խնդիրներ կան, պետական կառավարման համակարգում աշխատավարձերը ցածր են այն պատճառով, որ այդ կառավարման համակարգերն արդյունավետ չեն կառավարվում։

– Մենք պետք է ոչ թե սկզբից լավ ապրենք, և հետո մտածենք մեր պետության, պետական միջոցների արդյունավետ կառավարման մասին, այլ հակառակը պետք է տեղի ունենա։ Սկզբից մենք պետք է աշխատենք մեզնից յուրաքանչյուրի, մեր համակարգերի արդյունավետությունը բարձրացնելու ուղղությամբ, որից հետո անխուսափելիորեն կարձանագրվի մեր բոլորիս, նաև պետական կառավարման համակարգի աշխատողների բարեկեցության մակարդակը,- նշեց Ն. Փաշինյանը:

ՀՀ վարչապետը և հյուրերը ԱԻ նախարար Հրաչյա Ռոստոմյանի ուղեկցությամբ շրջեցին ԱԻ նախարարության տարածքով, ծանոթացան ՀՀ ԱԻՆ տարբեր ստորաբաժաբումների տեխնիկական հագեցվածությանը, գործունեությանը և աշխատանքային յուրահատկություններին:

Նշենք, որ ՀՀ կառավարության 1997 թ. սեպտեմբերի 4-ի թիվ 359 որոշմամբ ստեղծվում է արագ արձագանքման փրկարարական ջոկատը, որի գլխավոր խնդիրներն էին աղետի գոտում փրկարարական աշխատանքների իրականացումը, արտակարգ պատահարների դեպքում բնակչությանը հնարավոր սեղմ ժամկետում համապատասխան մասնագիտական օգնության ցուցաբերումը, ինչպես նաև՝ աղետների և վթարների դեպքում վերականգնողական աշխատանքների կատարումը: Հետայսու սեպտեմբերի 4-ը նշվում է՝ որպես ՀՀ արտակարգ իրավիճակների նախարարության աշխատակցի օր: