07.10.2026 | 15:51
Բաքուն արձագանքել է Գերմանիայի հետախուզության նախկին ղեկավարի՝ Ադրբեջանի հետ կապ ունենալու մասին լուրերին
Կարևոր է տարածաշրջանում կայունության համար․ Թուրքիան ողջունել է Իրանում Ադրբեջանի դեսպանատան աշխատանքի վերսկսումը
Քաղաքականություն
16.07.2024 | 16:10
Անկարան ողջունում է Իրանում Ադրբեջանի դեսպանատան աշխատանքի վերսկսումը, գրում են թուրքական լրատվամիջոցները։
«Մենք համարում ենք, որ Ադրբեջանի և Իրանի միջև հարաբերությունների կարգավորումն ու դիվանագիտական հարաբերությունների վերականգնումը կարևոր են տարածաշրջանում կայունության ու համագործակցության ոգու համար»,- ասվում է Թուրքիայի ԱԳՆ-ի հայտարարության մեջ։
Ադրբեջանի ԱԳՆ-ն հայտնել է, որ Բաքվի և Թեհրանի միջև բանակցությունների արդյունքում 2024 թվականի հուլիսի 15-ից Իրանում Ադրբեջանի դեսպանությունը վերսկսել է գործունեությունը նոր հասցեով։ Դեսպանն ու դեսպանատան ներկայիս անձնակազմը վերադարձել են Իրան։
«Դեսպանատան աշխատանքի վերսկսումը կնպաստի փոխադարձ հարգանքի և բարիդրացիության վրա հիմնված ադրբեջանա-իրանական հարաբերությունների հետագա զարգացմանը, երկու երկրների միջև ձեռք բերված պայմանավորվածությունների իրականացմանը և առկա հարցերի լուծմանը»,- ասվում է հայտարարության մեջ։
Հիշեցնենք, որ 2023 թվականի հունվարի 27-ին Իրանում Ադրբեջանի դեսպանատան վրա զինված հարձակման հետևանքով մեկ մարդ էր զոհվել, երկուսը՝ վիրավորվել։ Պաշտոնական Բաքուն դեսպանատան վրա իրականացված հարձակումն «ահաբեկչություն» էր որակել։ Միջադեպից հետո Բաքուն տարհանել էր Թեհրանում Ադրբեջանի դեսպանատան աշխատակիցներին, որից հետո դեսպանատան գործունեությունը դադարեցվել էր։ Հարձակումն իրականացրած անձը ձերբակալվել էր, և շուրջ մեկ տարի դատավարություն էր ընթանում։ Իրանի Արդարադատության նախարարությունը տեղեկություն էր տարածել, որ նա դատապարտվել է մահապատժի։
