23.06.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
Բայդենը հայտարարել է, որ ծեր է, բայց «անիծյալ լավ սուր միտք» ունի և ափսոսանք է հայտնել Թրամփին «թիրախի կենտրոնում» դնել հայտարարության համար․ ԱՄՆ նախագահի հարցազրույցը NBC-ին
Քաղաքականություն
16.07.2024 | 11:39
ԱՄՆ նախագահ Ջո Բայդենն առաջին հարցազրույցն է տվել նախագահի հանրապետական թեկնածու Դոնալդ Թրամփի դեմ մահափորձից հետո։ Սպիտակ տան ղեկավարը NBC-ին տված հարցազրույցում ասել է, որ դեռ Թրամփին սպառնալիք է համարում ամերիկյան ժողովրդավարության համար, սակայն ափսոսանք է հայտնել նրան «թիրախի կենտրոնում» դնելու անհրաժեշտության մասին խոսքերի համար։
Փենսիլվանիայում հանրահավաքի ժամանակ Թրամփի ականջին կրակելուց անմիջապես հետո Բայդենը դիմել է ժողովրդին՝ ամերիկացիներին կոչ անելով վմեղմացնել քաղաքական բանավեճի աստիճանը»: Սակայն մոտ մեկ տասնյակ հանրապետականներ սուր քննադատության ենթարկեցին նրան դեմոկրատ դոնորների հետ կոնֆերանսի ժամանակ Թրամփի մասին արտահայտությունների համար:
Ըստ Politico-ի՝ նախագահը մեկնաբանել է Դեմոկրատական կուսակցությունում բուռն բանավեճը՝ կապված Թրամփին դիմակայելու իր կարողության հետ: 81-ամյա Բայդենի որոշ դաշնակիցներ կասկածներ են հայտնել նրա մտավոր ունակությունների վերաբերյալ Թրամփի հետ տապալված բանավեճից հետո, որի ժամանակ Սպիտակ տան ղեկավարը հոգնած տեսք ուներ, հաճախ կակազում էր և չէր կարողանում հերքել իր հակառակորդի բազմաթիվ կեղծ հայտարարությունները։
Politico-ն գրում է, որ դոնորների հետ զրույցի ժամանակ Բայդենն ասել է հետևյալը. «Ես միայն մեկ աշխատանք ունեմ՝ դա Դոնալդ Թրամփին հաղթելն է։ Ես բացարձակապես վստահ եմ, որ ես դրա լավագույն թեկնածուն եմ։ Ուրեմն ժամանակն է, որ մենք դադարենք խոսել բանավեճերի մասին: Ժամանակն է Թրամփին թիրախի կենտրոնում դնել (նա օգտագործել է անգլերեն bullseye բառը)»։
Հանրապետական կուսակցությունից Բայդենի որոշ ընդդիմախոսներ կարծում են, որ Բայդենի խոսքերը կարող էին հրահրել նախագահի թեկնածուի դեմ մահափորձը։
NBC-ի հարցազրույցը, որը նախատեսված էր Փենսիլվանիայում տեղի ունեցած հանրահավաքում Թրամփի դեմ մահափորձից առաջ, Բայդենի ավելի լայն ռազմավարության մասն էր՝ ապացուցելու իր կարողությունները հունիսի 27-ի բանավեճի ժամանակ իր տապալված ելույթից հետո:
NBC-ի հարցազրուցավարի հարցին՝ արդյո՞ք նա հաղթահարել է իր սեփական կուսակցությունից այդ առնչությամբ ամենավատ խոչընդոտը, Բայդենը պատասխանել է, որ 14 միլիոն դեմոկրատ ընտրողներ ընտրել են իրեն փրայմերիզի միջոցով և հավելել. «Ես լսում եմ նրանց»:
«Ես ծեր եմ: Բայց, առաջին հերթին, ես ընդամենը երեք տարով եմ մեծ Թրամփից: Եվ երկրորդ՝ ես անիծյալ լավ սուր միտք ունեմ։ Իմ նախագահության երեքուկես տարիների ընթացքում ես շատ ավելին եմ արել, քան ԱՄՆ-ի ցանկացած այլ ղեկավար։ Ես ուզում եմ ինձ գնահատել այս չափման հիման վրա»,- ասել է Ջո Բայդենը NBC News-ի հարցազրույցում:
Բայդենը «թիրախի» մասին հայտարարությունը սխալ է անվանել։
«Սխալ էր այդ բառն օգտագործելը։ Ես նկատի ունեի՝ «թիրախի կենտրոնում, խնձորին»: Պետք է կենտրոնանանք նրա վրա, նրա արարքների վրա, նրա ծրագրի վրա։ Կենտրոնանանք այն կեղծ հայտարարությունների վրա, որոնք նա արել է բանավեճի ընթացքում»,- ասել է Ջո Բայդենը:
Հաղորդավար Լեսթեր Հոլթը նաև հարցրել է Բայդենին՝ արդյո՞ք նա պետք է վերանայի Թրամփի մասին իր որոշ այլ խոսքեր, ներառյալ՝ «նրանք, որոնք կարող են հրահրել անկայուն մարդկանց»: Ի պատասխան՝ Սպիտակ տան ղեկավարն ասել է, որ նման հռետորաբանությունը գալիս է իր քաղաքական հակառակորդից։
«Ես նման հռետորաբանությամբ չեմ զբաղվել, իմ հակառակորդն է զբաղվել նման հռետորաբանությամբ։ Ինչպե՞ս կարելի է խոսել ժողովրդավարությանն ուղղված սպառնալիքի մասին, իսկ այն միանգամայն իրական է, եթե նախագահը նման բաներ է ասում։ Ինչ է՝ իսկապե՞ս պետք է լռել, քանի որ դա կարող է ինչ-որ մեկին հրահրել։ Չէ՞ որ ես չեմ ասել, որ առաջին իսկ օրվանից ուզում եմ լինել բռնապետ, որ ես կհրաժարվեմ ճանաչել ընտրությունների արդյունքները»,- ասել է Բայդենը:
