07.10.2026 | 11:20
Հայտնի է հունահռոմեական ոճի ըմբշամարտի Հայաստանի հավաքականի կազմն ԱԱ-ում
5 ինքնաթիռ, շքեղ հյուրանոց. ԱՄՆ Էրդողանի ուղևորությունը քննադատությունների թիրախում է շռայլ ծախսերի պատճառով
Քաղաքականություն
16.07.2024 | 21:25
Թուրքիայի նախագահ Ռեջեփ Թայիփ Էրդողանը քննադատությունների թիրախում է հայտնվել ՆԱՏՕ-ի գագաթնաժողովին մասնակցելու նպատակով հինգ ինքնաթիռների ուղեկցությամբ Վաշինգտոն մեկնելու և քաղաքի ամենաթանկ հյուրանոցներից մեկում իջևանելու համար, գրում են թուրքական լրատվամիջոցները։
Մասնավորապես, լրագրող Ադեմ Յավուզ Արսլանը գրում է, որ Էրդողանը Վաշինգտոն է մեկնել հինգ ինքնաթիռով, որոնցից մեկը՝ ռազմական բեռնատար ինքնաթիռ։ Էրդողանն ուր էլ գնա, այս ինքնաթիռը տեղափոխում է Էրդողանի ծառայողական մեքենաները։ Աշխարհում չկա երկրորդ ղեկավար, որն իր ծառայողական մեքենաները տարել է ՆԱՏՕ-ի հանդիպմանը։ Դրանք կայանված են եղել Դալեսի օդանավակայանում։ Էրդողանի վարչակազմը շարունակել է շռայլ ծախսերը՝ իջևանելով Վաշինգտոնի ամենաթանկ հյուրանոցում։ Այն նախկինում պատկանել է Դոնալդ Թրամփին, իսկ ավելի ուշ սկսել է գործել «Աստորիա» անվան տակ՝ Hilton խմբի շքեղ հատվածում։
Թուրք լրագրողը հայտնում է, որ Էրդողանի պատվիրակությունը բառացիորեն փակելէ հյուրանոցը։
«Էրդողանն իր հետ տարել է 22 լրագրողների ու լրատվամիջոցների ղեկավարների։ Սակայն նրանցից ոչ մեկից մենք գագաթնաժողովի շոշափելի վերլուծություն չենք տեսել։ Փոխարենը հերոսական վերնագրեր ենք կարդում այն մասին, թե որքան մեծ ուշադրության է արժանացել Էրդողանը և ինչպես է նա իր ելույթով հետք թողել գագաթնաժողովում»,- նշում է Արսլանը։
Ընդդիմադիր «Լավ» կուսակցության (İYİ) փոխնախագահ Թուրհան Չյոմեզը նշել է, որ ՆԱՏՕ-ի նոր անդամների՝ Շվեդիայի և Ֆինլանդիայի առաջնորդները, օրինակ, Վաշինգտոն են մեկնել նույն ինքնաթիռով։
«Մի ինքնաթիռն Էրդողանի համար էր, մյուսը՝ նրա պատվիրակության, երրորդը՝ անձնակազմի և տեխնիկայի, չորրորդը՝ զրահատեխնիկայի, իսկ հինգերորդը՝ նախնական պատրաստության համար։ Նույնիսկ ԱՄՆ նախագահներն այդպես չեն ճանապարհորդում»,- նշել է նա։
Էրդողանին ուղեկցող թուրքական պատվիրակության կազմում էին արտգործնախարար Հաքան Ֆիդանը, պաշտպանության նախարար Յաշար Գյուլերը, Ազգային հետախուզական ծառայության (MİT) ղեկավար Իբրահիմ Քալընը և այլ բարձրաստիճան պաշտոնյաներ։ Նրանց ներկայությունը և ճամփորդության շքեղ բնույթը կտրուկ հակադրվում են Թուրքիայի շարունակական տնտեսական ճգնաժամին և վերջին խնայողական միջոցառումներին:
Էրդողանի վերջին ճամփորդությունը Բեռլին ևս քննադատությունների ալիք էր բարձրացրել։ Նա ներկա էր գտնվել Եվրո-2024-ի շրջանակում Նիդերլանդներ-Թուրքիա հանդիպմանը այն բանից հետո, երբ ազգային հավաքականի խաղացող Մերիհ Դեմիրալը ՈՒԵՖԱ-ի կողմից որակազրկվել էր երկու խաղով՝ հուլիսի 2-ին Ավստրիայի դեմ խաղում աջ ծայրահեղական «Գորշ գայլեր»-ի ժեստը ցուցադրելու համար։ Թուրքիայի նախագահին ուղեկցել էր չափազանց մեծ ավտոշարասյուն՝ զարմացնելով շատ գերմանացիների և հայրենիքում հարցեր առաջացնելով պետական ծախսերի վերաբերյալ:
Մինչ Էրդողանը շարունակում է բախվել իր շքեղ ապրելակերպի համար քննադատությունների, հասարակության հիասթափությունն աճում է պետական ծախսերի և շարքային քաղաքացիների ֆինանսական դժվարությունների միջև անջրպետի պատճառով: Այս շռայլ ծախսերը հատկապես վիճահարույց են՝ հաշվի առնելով վերջերս Թուրքիայի կառավարության կողմից մայիսին հրապարակված «Խնայողության միջոցառումների շրջաբերականը»: Տնտեսագետներն ընդգծում են խնայողության միջոցառումների անարդյունավետությունը, որոնք չեն վերաբերում նախագահական պալատի, ինքնաթիռների և մեծ ավտոշարասյունների անիմաստ ծախսերին:
Էմմա Չոբանյան
