Օրբանը Ուկրաինա և ՌԴ կատարած այցերից հետո իր «խաղաղության ծրագիրն» է ուղարկել ԵՄ առաջնորդներին

Հունգարիայի վարչապետ Վիկտոր Օրբանը Ուկրաինա, Ռուսաստանի Դաշնություն և Չինաստան կատարած այցերից  հետո ԵՄ առաջնորդներին ներկայացրել է իր «խաղաղարար առաքելության» արդյունքները և Բուդապեշտի «խաղաղության առաջարկները»։ Այս մասին ասել է Հունգարիայի վարչապետի գրասենյակի քաղաքական տնօրեն Բալաժ Օրբանը հունգարական Magyar Nemzet-ին տված հարցազրույցում, փոխանցում է  Украинская правда-ն։

Նա, մասնավորապես, նշել է, որ «Օրբանի ծրագիրն այժմ դրված է ԵՄ յուրաքանչյուր առաջնորդի սեղանին»։ Բալաժ Օրբանն ասել է, որ Հունգարիայի վարչապետի՝ Կիև և Մոսկվա կատարած այցերից «պարզ է  դարձել, որ Ուկրաինան և Ռուսաստանը շատ վճռական են պայքարելու հարցում»:

«Եվ առանց արտաքին միջնորդների միջամտության մենք, ցավոք, առաջիկա ամիսներին կտեսնենք շատ լուրջ ավերածություններ»,- ասել է նա։

Դրանից հետո, ըստ Օրբանի, Հունգարիան բանակցություններ է սկսել պոտենցիալ միջնորդների՝ Չինաստանի, Թուրքիայի և ԱՄՆ նախկին նախագահ Դոնալդ Թրամփի հետ։

«Սակայն եվրոպացիները և ԱՄՆ ներկայիս վարչակազմը կողմ են պատերազմի շարունակմանը: Վարչապետը ԵՄ առաջնորդներին նամակ է գրել բանակցությունների, խաղաղարար առաքելության առաջին փուլի արդյունքների և հունգարական առաջարկների մասին: Եթե Եվրոպան խաղաղություն է ուզում և ցանկանում է վճռական ձայն ունենալ պատերազմը լուծելու և արյունահեղությունը դադարեցնելու հարցում, այժմ պետք է զարգացնի և իրականացնի ուղղության փոփոխություն»,- նշել է նա։

Օրբանը նաև կարծում է, որ Հունգարիայի՝ որպես միջնորդի դերը չպետք է թերագնահատվի, քանի որ երկիրը կարող է «լուրջ դեր խաղալ միջնորդության հարցում»:

«Հունգարիան ունակ միջնորդ է, ինչպես ցույց տվեցին վերջին երկու շաբաթները, և այժմ մեր խնդիրն է համատեղել այս նոր մոտեցումը և փորձել համոզել Եվրամիության անդամ երկրներին Վիկտոր Օրբանի ծրագրի արդյունավետության հարցում»,- հայտարարել է նա։