Ադրբեջանի ընդդիմադիր «Ժողովրդական ճակատ» կուսակցությունը բոյկոտում է Մեջլիսի արտահերթ ընտրությունները

Ադրբեջանի ընդդիմադիր «Ժողովրդական ճակատ» կուսակցությունը բոյկոտում է սեպտեմբերի 1-ին նախանշված արտահերթ խորհրդարանական ընտրությունները։ Որոշումն ընդունել է կուսակցության Գերագույն ժողովը։

«Հաշվի առնելով, որ երկրում ավելի քան 300 քաղբանտարկյալներ դեռևս ազատ չեն արձակվել, հավաքների ազատությունն արգելված է, ընտրական հանձնաժողովները գտնվում են իշխանությունների լիակատար վերահսկողության ներքո, քվեարկության գործընթացի և ձայների հաշվարկի վերահսկողությունն անհնար է, ազատ մամուլը ոչնչացված է, անկախ տեղական դիտորդների կողմից ընտրությունների դիտարկումը չի թույլատրվում, ինչպես նաև բացակայում է մրցակցությունը և արդար ընտրական միջավայրը, Միլլի Մեջլիսի արտահերթ ընտրությունները, որոնք նշանակված են 2024 թվականի սեպտեմբերի 1-ին, բոյկոտվելու են»,- ասվում է հայտարարության մեջ։

Գերագույն ժողովը նաև որոշում է կայացրել երեք ամսվա ընթացքում հրավիրել կուսակցության արտահերթ համագումար։

Կուսակցության նախագահ Ալի Քերիմլին, իր հերթին, ասել է, որ «Քաղաքական կուսակցությունների մասին» նոր օրենքը կառավարությանը տալիս է քաղաքական կուսակցությունների գործերին միջամտելու լրացուցիչ լիազորություններ։

Քաղաքական այս ուժը բոյկոտել է նաև 2015 և 2020 թվականների Միլլի Մեջլիսի ընտրությունները։

Նշենք, որ ընդդիմադիր «Մուսավաթ» և «Հանրապետական ​​այլընտրանք» (ReAl) կուսակցությունները մասնակցելու են ընտրություններին։ Հունիսին երկու կուսակցություններն էլ մասնակցել էին Ադրբեջանի նախագահականի կողմից կազմակերպված տարբեր կուսակցությունների և իշխանության ներկայացուցիչների հանդիպմանը, ինչը քննադատությունների առիթ էր տվել։ Հանդիպումից հետո ակտիվացել էին լուրերը, որ երկու ուժերն էլ մասնակցելու են արտահերթ խորհրդարանական ընտրություններին՝ իշխանությունների հետ պայմանավորվածության արդյունքում։

Հիշեցնենք՝ հունիսի 28-ին Ադրբեջանի նախագահ Իլհամ Ալիևը հրամանագիր էր ստորագրել երկրի վեցերորդ գումարման Միլլի Մեջլիսը ցրելու և արտահերթ ընտրություններ նշանակելու մասին։ Ալիևը խորհրդարանի արտահերթ ընտրությունները նշանակել է 2024 թվականի սեպտեմբերի 1-ին։ Երկրի Սահմանադրական դատարանի պլենումն ավելի վաղ քննարկել էր Ալիևի դիմումը Միլլի Մեջլիսը ցրելու և արտահերթ ընտրություններ նշանակելու վերաբերյալ՝ որոշելով, որ այն համապատասխանում է Սահմանադրությանը։

Էմմա Չոբանյան