23.06.2026 | 22:15
Ովքե՞ր կարող են օգտվել կաթի արտադրության սուբսիդավորման ծրագրից և ինչպես դիմել. նախարարությունը մանրամասնում է
CNN-ը Թրամփի դեմ մահափորձից մանրամասներ է հայտնել
Քաղաքականություն
15.07.2024 | 12:13
ԱՄՆ նախկին նախագահ Դոնալդ Թրամփի դեմ մահափորձից անմիջապես առաջ ոստիկաններից մեկը կրակողին տեսել է տանիքի վրա։ Այս մասին հայտնում է CNN-ը՝ վկայակոչելով Բաթլեր շրջանի շերիֆ Մայքլ Սլուփին։
«Կասկածելի անձին որոնելիս քաղաքային ոստիկանության աշխատակիցները պարզել են, որ կրակողը տանիքին է եղել, տեղի սպաներից մեկը բարձրացել է մյուս տանիքի եզրին։ Կրակողը շրջվել է, տեսել է ոստիկանին ու զենքն ուղղել նրա վրա։ Սպան հեռացել է տանիքի եզրից՝ թաքնվելու և իր կյանքը փրկելու համար։ Այնուհետև կրակողը տանիքից սկսել է կրակել»,- ասվում է CNN-ի հրապարակման մեջ։
Շրջանային ոստիկանության աշխատակիցները դեպքից կարճ ժամանակ առաջ ստացել են կասկածելի անձի մասին հաղորդում, սակայն դրանում չի նշվել, որ նա կարող է զինված լինել, ասել է Սլուփը:
Հիշեցնենք՝ Փենսիլվանիայում հրապարակային ելույթի ժամանակ Թրամփի դեմ մահափորձ է իրականացվել։ Տեսանյութում երևում է, թե ինչպես են անվտանգության աշխատակիցները թևերից բռնած տանում քաղաքական գործչին, նրա ականջից արյուն է հոսում։
Ավելի ուշ Թրամփը հայտնել է, որ գնդակը դիպել է իր ականջին և շատ արյուն է կորցրել: ԱՄՆ գաղտնի ծառայությունները հայտնել են, որ կասկածյալը, որը մի քանի կրակոց է արձակել բեմի ուղղությամբ, սպանվել է: Հրաձգության հետևանքով զոհվել է հավաքի մասնակիցներից մեկը՝ 50-ամյա նախկին հրշեջ, ևս երկուսը ծանր վնասվածքներ են ստացել։
Կասկածյալը 20-ամյա Թոմաս Մեթյու Քրուքսն է Փենսիլվանիայից, որտեղ տեղի է ունեցել նախընտրական հավաքը։ Հաղորդվում է, որ նա թաքնվել է արտադրական շենքի տանիքին՝ բեմից մոտ 100 մետր հեռավորության վրա՝ այն տարածքից դուրս, որտեղ ընթանում էր միջոցառումը:
Հետաքննությունների դաշնային բյուրոն կատարվածն անվանել է Թրամփի դեմ մահափորձ։
