19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Քաղաքականությունը երբեք չպետք է լինի մարտի դաշտ․ Բայդենը Թրամփի դեմ մահափորձից հետո ուղերձով է հանդես եկել
Քաղաքականություն
15.07.2024 | 11:01
ԱՄՆ նախագահ Ջո Բայդենը ուղերձով դիմել է ամերիկացիներին նոյեմբերին կայանալիք նախագահական ընտրություններում իր հավանական մրցակից Դոնալդ Թրամփի դեմ մահափորձից հետո, փոխանցում է DW-ի ռուսական ծառայությունը։
«Հայրենակիցնե՛ր, այսօր ցանկանում եմ ձեզ հետ խոսել մեր քաղաքական կյանքում ջերմաստիճանը նվազեցնելու անհրաժեշտության մասին։ Քաղաքականությունը երբեք չպետք է լինի մարտի դաշտ։ Մենք մեր վեճերը լուծում ենք քվեատուփերի մոտ, ոչ թե փամփուշտների միջոցով»,- ասել է ԱՄՆ նախագահը։
Նա նշել է, որ մտադիր է շարունակել ակտիվորեն պաշտպանել «ժողովրդավարությունն և օրենքի գերակայությունը»՝ կոչ անելով գործել քվեատուփի մոտ՝ «առանց բռնության փողոցներում»։
«Մենք հանդես ենք գալիս ոչ թե ծայրահեղականության և զայրույթի Ամերիկայի, այլ պարկեշտության և բարության օգտին»,- ասել է Բայդենը։
Ուղերձում Բայդենը նախազգուշացրել է ապատեղեկատվության և «օտարերկրյա դերակատարների մասին, որոնք բորբոքում են բաժանարար կրակը»՝ նպատակ ունենալով ստանալ ընտրությունների այնպիսի արդյունքներ, որոնք «բխում են իրենց շահերից, ոչ թե ամերիկյան»:
Հիշեցնենք՝ ԱՄՆ նախկին նախագահ, հանրապետական Դոնալդ Թրամփի վրա կրակել էին հուլիսի 13-ին Փենսիլվանիայի Բաթլեր քաղաքում նախընտրական հանրահավաքում ելույթի ժամանակ։ Գնդակը դիպել էր նրա ականջին։ Հարձակվողը, որը հետագայում նույնականացվել է որպես Փենսիլվանիայի Բեթել-Պարկի բնակիչ, 20-ամյա Թոմաս Մեթյու Քրուքսն է։ Նա սպանվել է անվտանգության ուժերի կողմից:
