Քաղաքականություն
12.07.2024 | 15:27
Ռուսական իշխանությունները մահափորձ են նախապատրաստել գերմանական Rheinmetall կոնցեռնի ղեկավար Արմին Պապերգերի դեմ, սակայն ԱՄՆ-ին և Գերմանիային հաջողվել է կանխել այն։ Այս մասին հայտնել է CNN-ը՝ վկայակոչելով ամերիկացի և եվրոպացի հինգ պաշտոնյաների, փոխանցում է Current time-ը։
Լրատվամիջոցի զրուցակիցները պատմել են, որ ռուսական իշխանությունների ծրագրերի մասին նախ իմացել է ԱՄՆ-ը, ապա ամերիկյան հետախուզությունն այդ մասին հայտնել է Գերմանիայի գործընկերներին, որոնք կարողացել են պաշտպանել Պապերգերին։ Սպառազինություն արտադրող կոնցեռնի ղեկավարի դեմ մահափորձը, աղբյուրների պնդմամբ, Եվրոպայում պաշտպանական ընկերությունների ղեկավարների սպանությունների պլանի մի մասն է եղել, մինչդեռ Պապերգերի հետ կապված ծրագրերն ավելի առաջնային փուլում էին:
Գերմանական Der Spiegel-ն էլ գրել է, որ սպառնալիքի նշաններ իսկապես եղել են։ Գերմանիայի իշխանությունները մոտ երկու ամիս առաջ նախազգուշացում են ստացել ԱՄՆ հետախուզական կառույցներից։ Սակայն որևէ կոնկրետ նշան չի եղել ծրագրված հարձակման բնույթի կամ կատարողների կոնկրետ խմբի մասին։ Բարձրաստիճան պաշտոնյաները հայտարարել են, որ մահափորձի կանխումը «չափազանց արմատական ձևակերպում է»։
ԱՄՆ-ի և Գերմանիայի իշխանություններն ու Rheinmetall-ի ներկայացուցիչը հրաժարվել են մեկնաբանություններից: Ինքը՝ Արմին Պապերգերը, The Financial Times-ին ասել է, որ վստահում է CNN-ի տեղեկատվությանը, սակայն մանրամասներ հայտնել չի կարող։ Նրա խոսքով՝ Գերմանիայի կառավարությունը բարձր մակարդակով ապահովում է իր անվտանգությունը։
Rheinmetall-ը Գերմանիայի ամենամեծ ընկերությունն է զենքի և ռազմական տեխնիկայի արտադրության, այդ թվում՝ Ուկրաինային մատակարարումների ոլորտում: Ընկերությունն Ուկրաինայում գործարան է բացում զրահատեխնիկայի արտադրության և վերանորոգման համար, ինչպես նաև նախատեսում է կառուցել ևս մի քանի այլ գործարան, մասնավորապես՝ հրետանային արկերի արտադրության։
