14.01.2026 | 18:44
Ղրղզստանում առաջարկում են Վլադիմիր Սոլովյովին անցանկալի անձ հայտարարել
Թուրքիայի և Հունաստանի ղեկավարները հանդիպել են Վաշինգտոնում
Քաղաքականություն
11.07.2024 | 13:07
Թուրքիայի նախագահ Ռեջեփ Թայիփ Էրդողանը և Հունաստանի վարչապետ Կիրիակոս Միցոտակիսը հանդիպել են Վաշինգտոնում ՆԱՏՕ-ի գագաթնաժողովի շրջանակում: Թուրքական կողմի հաղորդմամբ՝ հանդիպմանը քննարկվել են Թուրքիայի և Հունաստանի միջև երկկողմ հարաբերությունները, ինչպես նաև տարածաշրջանային ու գլոբալ հարցեր։
Էրդողանը հայտարարել է, որ Թուրքիան շարունակում է ջանքերը՝ խթանելու բարիդրացիական հարաբերությունները Հունաստանի հետ, և որ այդ ջանքերն է՛լ ավելի աճելու են։ Նա նշել է, որ անհրաժեշտ է ակտիվացնել դրական գործողությունները՝ Ուկրաինայում և Պաղեստինում հակամարտությունները դադարեցնելու համար, և որ տարածաշրջանի բոլոր երկրները կշահեն այս տարածաշրջաններում խաղաղության ապահովմանն ուղղված աշխատանքից։
Միցոտակիսն էլ գոհունակություն է հայտնել անօրինական միգրացիայի դեմ պայքարում երկու երկրների համագործակցության կապակցությամբ։ Նա նաև անդրադարձել է Կիպրոսին՝ ասելով, որ կղզին չի կարող երկար մնալ բաժանված, և որ վերամիավորման բանակցությունները պետք է վերսկսվեն։
Կողմերը համակարծիք են եղել, որ երկկողմ հարաբերություններում տիրող հարաբերական անդորրը փոխշահավետ է և պետք է շարունակվի։
Էրդողանը և Միցոտակիսը պայմանավորվել են հետագա քայլեր ձեռնարկել երկկողմ առևտրի ոլորտում՝ նպատակ ունենալով կրկնապատկել առևտրի ծավալը։ Նրանք նաև պայմանավորվել են կրկին հանդիպել սեպտեմբերին՝ Նյու Յորքում ՄԱԿ-ի Գլխավոր վեհաժողովի ժամանակ։
