Բեռլինը վերանայում է հարաբերությունները Թբիլիսիի հետ և դադարեցնում ռազմական գործընկերությունը․ Վրաստանում Գերմանիայի դեսպան

Վրաստանը ԵՄ-ի անդամակցության թեկնածու երկիր է, բայց մենք այս գործընթացում հասել ենք շատ դժվար կետի։ Վրացական կառավարության քաղաքական կուրսի պատճառով ԵՄ-ին Վրաստանի միանալու գործընթացը դադարեցվել է։ Այս մասին հայտարարել է Թբիլիսիում Գերմանիայի դեսպան Պետեր Ֆիշերը։

Դեսպանի խոսքով՝ անդամակցության գործընթացի արագությունն ու որակը թեկնածու երկրի ձեռքում են։ Նա, միաժամանակ, նշել է, որ Գերմանիան վերանայում է հարաբերությունները Վրաստանի հետ։

«Պետք է հնարավորինս արագ առաջ շարժվել։ Մենք ուզում ենք առաջ գնալ, բայց անդամակցության գործընթացի արագությունն ու որակը թեկնածու երկրի ձեռքում են։ Ես կխոսեմ գերմանական կողմից և կասեմ, որ մենք դիտարկում ենք նաև մեր հարաբերությունները Վրաստանի հետ, մենք ունենք շատ երկար և խորը հարաբերություններ։ Մենք Միացյալ Նահանգների հետ միասին Վրաստանի զարգացման համագործակցության խոշորագույն դոնորներից ենք։ Այս պահին որոշել ենք նոր պարտավորություններ չստանձնել Վրաստանի հետ կապված, ուստի Գերմանիան ներկայում չի ընդունում նոր ֆինանսական պարտավորություններ Վրաստանի նկատմամբ։ Գերմանացի զինվորականները նույնպես դուրս են եկել նոր գործընկերությունից»,- ասել է Ֆիշերը։

Ըստ դիվանագետի՝ չեղարկվել է այն ծրագիրը, որն անցկացվում էր Թբիլիսիում անցյալ տարի և պետք է կայանար այս ամառ՝ Բեռլինում։

«ԱՄՆ-ի հետ միասին մենք եղել ենք Վրաստանի պաշտպանական լավագույն գործընկերը, դա այն է, ինչ ուզում ենք լինել։ Մենք դիտարկում ենք իրավիճակը և համապատասխան որոշում կկայացնենք»,- հայտարարել է դեսպանը։