ՌԴ-ն հայտնում է «Ադմիրալ Կուզնեցով» նավի վրա ահաբեկչությունը և բարձրաստիճան երեք զինվորականի դեմ մահափորձը կանխելու մասին

ՌԴ Անվտանգության դաշնային ծառայությունը (ԱԴԾ) հայտարարել է, որ կանխել է ահաբեկչական հարձակումը «Ադմիրալ Կուզնեցով» ավիակիր նավի վրա, ինչպես նաև ՊՆ երեք բարձրաստիճան աշխատակիցների դեմ մահափորձը։ Գերատեսչությունը պնդում է, թե հանցագործությունները, ենթադրաբար, ծրագրել են ուկրաինական հատուկ ծառայությունները, գրում է Meduza-ն։

Ըստ ԱԴԾ-ի՝ մարտին «Ադմիրալ Կուզնեցովի» անձնակազմի անդամի հետ «օտարերկրյա ինտերնետ մեսենջերների՝ WhatsApp-ի և Telegram-ի միջոցով կապ է հաստատել Ուկրաինայի հատուկ ծառայությունների աշխատակիցը, որը, «օգտագործելով հոգեբանական ազդեցության տեխնիկան», փորձել է համոզել նրան ահաբեկչություն կատարել նավի վրա։ Նա, սակայն, դիմել է ԱԴԾ-ին, որից հետո գրագրություն է ունեցել արդեն հետախուզական ծառայությունների հսկողության տակ գտնվող գործակալի հետ՝ արժեքավոր տեղեկություններ պարզելու համար։

Բարձրաստիճան զինվորականների դեմ մահափորձեր նախապատրաստելու գործի շրջանակում ձերբակալվել է 1994 թվականին ծնված Ռուսաստանի քաղաքացի (նրա անունը չի հրապարակվում): Ըստ ԱԴԾ-ի՝ նա, Ուկրաինայի ՊՆ գլխավոր հետախուզական վարչության հանձնարարականով, «առաքման ծառայությունների միջոցով կազմակերպել է նվերների փաթեթավորմամբ քողարկված երեք հզոր պայթուցիկ սարքերի մատակարարումը Մոսկվայում այն հասցեներում, որտեղ բնակվում են  Ռուսաստանի պաշտպանական գերատեսչության վարչությունների ղեկավարները։

ԱԴԾ-ն նշում է, թե ձերբակալվածը խոստովանել է, որ 2024 թվականի մայիսին հավաքագրվել է Ուկրաինայի ռազմական հետախուզության կողմից։