Դիլիջանի նոր թունել կկառուցվի․ եղածի վերականգնման արժեքը բավականին բարձր կլինի․ ՏԵՍԱՆՅՈՒԹ

Առաջարկվող փոփոխությամբ երկարացվում է համաձայնագրի ժամկետը, որն ավարտվել է 2023 թվականի դեկտեմբերին: Ծրագիրն ամբողջությամբ ավարտված է, սակայն հետավարտական փուլում առկա են որոշակի պարտավորություններ, որոնք կատարման ենթակա են, ուստի առաջացել է ժամկետը մինչեւ օգոստոսի 31-ը երկարացնելու անհրաժեշտություն: Այս մասին ասել է ՀՀ տարածքային կառավարման եւ ենթակառուցվածքների նախարարի տեղակալ Քրիստինե Ղալեչյանն ԱԺ ֆինանսավարկային եւ բյուջետային հարցերի մշտական հանձնաժողովի` հունիսի 10-ի արտահերթ նիստում:

Հանձնաժողովը քննարկել է «Հայաստանի Հանրապետության եւ Ասիական զարգացման բանկի միջեւ «Վարկ 3449-ARM. «Հայաստան-Վրաստան սահմանային տարածաշրջանային ճանապարհի (Մ6 Վանաձոր-Բագրատաշեն) բարելավման ծրագիր»-վարկի փակման ժամկետի երրորդ երկարաձգում եւ վարկային միջոցների վերաբաշխում» նամակ-համաձայնագիրը վավերացնելու մասին» օրենքի նախագիծը:

Ծրագրով նախատեսված է իրականացնել Պուշկին, Դիլիջան թունելների` նախագծային աշխատանքները, որոնք պատվիրված են եւ նախագծային փուլում են: Փոխնախարարը նշել է, որ կատարվել են ուսումնասիրություններ, ըստ որոնց` անհրաժեշտություն է առաջացել փոփոխել նախագծային առաջադրանքը եւ Դիլիջանի թունելի համար նոր նախագիծ պատվիրել: «Մենք կարծում ենք, որ Դիլիջանի նոր թունելի կառուցման անհրաժեշտություն կա: Նախագիծը, որն ի սկզբանե պատվիրել էինք թունելի վերականգնման համար, կփոփոխվի եւ նոր թունելի կառուցման նախագիծ կներկայացվի»,- ասել է Քրիստինե Ղալեչյանը:

Օրենքի նախագիծը ստացել է դրական եզրակացություն:

Հանձնաժողովին ներկայացվել է նաեւ Ազգային ժողովի բյուջետային գրասենյակի 2024 թվականի երկրորդ եռամսյակի հաշվետվությունը կատարած աշխատանքների վերաբերյալ:

Բյուջետային գրասենյակի փորձագետ Արմինե Վարշամյանի տեղեկացմամբ գրասենյակը հաշվետու ժամանակահատվածում ԱԺ մշտական հանձնաժողովներից ստացել է 8 հարցում: Դրանց հիման վրա պատրաստվել եւ ԱԺ նախագահի տեղակալներին, բոլոր մշտական հանձնաժողովներին, ինչպես նաեւ խմբակցություններին եւ պատգամավորներին է տրամադրվել 219 տեղեկանք: Առաջին կիսամյակի ընթացքում պատրաստվել է 387 տեղեկանք:

Գրասենյակը սահմանված ժամկետում պատրաստել ու ԱԺ ֆինանսավարկային եւ բյուջետային հարցերի մշտական հանձնաժողովին է տրամադրել «ՀՀ 2023 թվականի պետական բյուջեի կատարման մասին» տարեկան հաշվետվության ամփոփ նկարագիրը, ինչպես նաեւ 2024 թվականի առաջին եռամսյակի պետական բյուջեի կատարման ընթացքի վերաբերյալ Կառավարության ներկայացրած տեղեկանքի ամփոփ նկարագիրը: