Քանի դեռ Բիշքեկյան արձանագրության հիմքերի հիմքը չի փոխվել, մենք այդ վտանգն ունենալու ենք․Լարիսա Ալավերդյանը՝ ադրբեջանցիների նախաձեռնության մասին․ ՏԵՍԱՆՅՈՒԹ

Երբ մենք խոսում ենք Արցախի շրջափակման մասին, մենք պետք է խոսենք այն դեպքերի մասին, որոնք տեղի են ունեցել դեռևս 1988 թվականի փետրվարի 21-ից հետո, երբ փակված էին ճանապարհները, քարկոծվում էին Ստեփանակերտ հասնող տրանսպորտային միջոցները, իսկ սննդով բարձված մեքենաները չէին կարողանում հասնել Արցախ, այնպես որ, եթե ինչ-ինչ պատճառներով մի պահ այդ ամենին դադար է տրվել, դա դեռ չի նշանակում, որ նման մեթոդներ նորից ի գործ չեն դրվի։ 

Այս մասին այսօր հրավիրված մամուլի ասուլիսի ժամանակ ասաց «Ընդդեմ իրավական կամայականությունների» ՀԿ-ի նախագահ Լարիսա Ալավերդյանն՝ անդրադառնալով  օրերս Բարդա-Աղդամ ուղղությամբ սահմանահատվածը հատելու փորձ արած ադրբեջանցիների նախաձեռնությանը։ 

 «Նման  քայլերը կարելի է  կանխել միայն ու միայն ոչ թե բանակով, ոչ թե սահմանապահներով, այլ՝ դիվանագիտական և այլ միջազգային հարթություններում։ Պետք է փոխվի այն պատկերացումը, որն այսօր գոյություն ունի Արցախի հարցի վերաբերյալ։ Այսօր միայն Մադրիդյան սկզբունքներն են սեղանի վրա, որոնք անփոփոխ մնում են, իսկ դրանց պահանջներից մեկն ընդգրկված է եղել դեռ 1994 թվականի Բիշքեկյան արձանագրության մեջ, ըստ որի, դա հայկական ուժերի դուրսբերումն է զբաղեցրած տարածքներից։ Այնպես որ, մենք այստեղ որևէ կեղծ հույսեր չպետք է փայփայենք, մինչև չլինի փոփոխություն այդ հիմքերի հիմքում, մենք այդ վտանգը միշտ ունենալու ենք»,-ասաց Լարիսա Ալավերդյանը։

Վերջինս նշեց, որ ՀՀ-ում կան փորձագետներ, որոնք  Մադրիդյան սկզբունքների վերաբերյալ առաջարկություններ ունեն, ուստի իշխանությունները պետք է մասնագետների հետ համագործակցեն։

«Պետք է գործիքակազմ ստեղծել, որպեսզի փորձագետների առաջարկությունները տեղափոխվեն դիվանագիտական դաշտ, իսկ դա բավականին մեծ հմտություններ պահանջող աշխատանք է» ,-ասաց նա։

Մանրամասները՝ տեսանյութում։