Քաղաքականություն
04.07.2024 | 20:44
ՌԴ Պետդուման առաջին ընթերցմամբ և ամբողջությամբ ընդունել է օրենք, որով պատգամավորները պետք է նախապես համաձայնեցնեն իրենց արտերկրյա այցերը, գրում է Meduza-ն։
Փաստաթղթով փոփոխություններ են մտցվում «Ռուսաստանի Դաշնության սենատորի կարգավիճակի և ՌԴ Դաշնային ժողովի Պետական դումայի պատգամավորի կարգավիճակի մասին» դաշնային օրենքում, որը ենթադրում է՝ սենատորների ու պատգամավորներների լիազորությունները կարող են վաղաժամկետ դադարեցվել, եթե նրանց արտերկիր այցերը չեն համաձայնեցվել։
Հաստատման կարգը և ժամկետները առանձին կսահմանվեն Պետդումայի և Դաշնության խորհրդի խորհուրդների կողմից: Օրենքն ինքը ուժի մեջ է մտնում պաշտոնական հրապարակման օրվանից։
Օրենքի հեղինակներից մեկը՝ Դումայի անվտանգության և կոռուպցիայի դեմ պայքարի հանձնաժողովի ղեկավար Վասիլի Պիսկարևը, պարզաբանել է, որ «այս որոշումը թելադրված է անվտանգության խնդիրներով, ինչպես պետության, այնպես էլ՝ հենց արտասահման մեկնողների»։
Նրա խոսքով՝ «Կիևի ռեժիմն» արդեն երկարաժամկետ ազատազրկման է դատապարտել մի շարք պատգամավորների, քանի որ հետախուզվողներն Ինտերպոլի պահանջով կարող են ձերբակալվել այլ երկրում։
«Ռուս քաղաքական գործիչներին ապօրինի ձերբակալելու օրդեր է տալիս նաև, այսպես կոչված, «Միջազգային քրեական դատարանը», – ասել է Պիսկարևը։ Ըստ նրա՝ պետության անվտանգության ապահովումը ևս կարևոր է, քանի որ Պետդումայի բոլոր պատգամավորներն ու սենատորներն ի պաշտոնե հասանելիություն ունեն պետական գաղտնիք հանդիսացող տեղեկությունների։
Պետդումայի նախագահ Վյաչեսլավ Վոլոդինը նաև հանձնարարել է մշակել պատգամավորների լիազորությունների ավարտից հետո որոշակի ժամկետով Ռուսաստանից մեկնելու արգելքի հարցը։
