14.01.2026 | 09:39
ԹՐԻՓՓ-ի միջոցով ինչի են ձգտում ՀՀ-ն ու ԱՄՆ-ը, ինչ օգուտներ են ակնկալում 2 երկրները
Թուրքիայում պահանջում են տարեկան 4 անգամ բարձրացնել նվազագույն աշխատավարձը՝ ռեկորդային գնաճի պատճառով
Քաղաքականություն
03.07.2024 | 23:30
Թուրքիայի առաջատար արհմիության հետազոտական կենտրոնն իր վերջին զեկույցում նշում է, որ թուրքական կառավարությունը պետք է տարեկան 4 անգամ բարձրացնի ամսական նվազագույն աշխատավարձը՝ երկրում բարձր գնաճին և կյանքի ծախսերի ճգնաժամին դիմակայելու համար, գրում են տեղական լրատվամիջոցները։ Թուրքիան արդեն մի քանի տարի է՝ պայքարում է սպառողական գների աճի և դժվարին կենսապայմանների դեմ, իսկ մայիսին գնաճը, ըստ պաշտոնական տվյալների, կազմել է 75,4 տոկոս:
Առաջադիմական արհմիությունների կոնֆեդերացիայի (DİSK-AR) հետազոտական կենտրոնի նախագահ Արզու Չերքեզօղլուն ասուլիսում ներկայացրել է նվազագույն աշխատավարձի և հարկման մասին զեկույցը։ Սա տեղի է ունենում մեկ շաբաթ անց այն բանից հետո, երբ աշխատանքի նախարար Վեդաթ Իշըկհանը բացառել էր 2024 թվականի երկրորդ կիսամյակում նվազագույն աշխատավարձի միջանկյալ բարձրացումը։
DİSK-AR-ի զեկույցը կառավարությանը խորհուրդ է տալիս բարձր գնաճի ժամանակաշրջաններում տարեկան չորս անգամ բարձրացնել նվազագույն աշխատավարձը, որը ներկայում կազմում է 17,002 լիրա, մինչև այն հասցվի միանիշ թվի: Չերքեզօղլուն նաև ասել է, որ նվազագույն աշխատավարձն այժմ մնում է սովի շեմից ցածր, և կանխատեսվում է, որ մինչև տարեվերջ այն կլինի 4000 կամ 5000 լիրայով ավելի ցածր։ Նա հավելել է, որ միջանկյալ բարձրացում չկատարելու՝ կառավարության որոշումը նշանակում է, որ միլիոնավոր մարդիկ սոված կմնան։
«Թուրքիայի աշխատավոր դասակարգի կեսից ավելին դատապարտված է նվազագույն աշխատավարձ ստանալուն, իսկ նվազագույն աշխատավարձը ճնշված է գնաճով»,- ասել է Չերքեզօղլուն։
Զեկույցի համաձայն՝ Թուրքիան Եվրոպայում ամենացածր նվազագույն աշխատավարձերից մեկն ունի, և միայն հինգ երկիր է տարեսկզբին ավելի ցածր նվազագույն աշխատավարձ ունեցել՝ 2014-ի 12-ի դիմաց:
Զեկույցում ասվում է նաև, որ որպես տնտեսության վերականգնմանն ուղղված «կոշտ հարկաբյուջետային քաղաքականության» մաս՝ կառավարությունը նպատակ ունի վերահսկել գնաճը՝ չբարձրացնելով աշխատավարձերը, ինչը կնվազեցնի գնողունակությունը և կհարվածի հիմնականում ցածր եկամուտ ունեցողներին:
Ըստ զեկույցի՝ կառավարության այն պնդումը, թե աշխատավարձերի բարձրացումը կհանգեցնի գնաճի խթանման, «իրատեսական չէ»։
Թուրքիայի 85 միլիոն բնակչության մոտավորապես մեկ երրորդը ստանում է նվազագույն աշխատավարձ:
Վերջին անգամ կառավարությունը նվազագույն աշխատավարձը բարձրացրել է 2023 թվականի դեկտեմբերին՝ մարտի 31-ին կայացած ՏԻՄ ընտրություններից երեք ամիս առաջ։
Էմմա Չոբանյան
