Երևանին և Բաքվին հրավիրելով ՆԱՏՕ-ի գագաթնաժողովին՝ Արևմուտքը ցանկանում է նրանց կտրել Մոսկվայի հետ համագործակցությունից․ ՌԴ ԱԳՆ

Հայաստանին ու Ադրբեջանին հրավիրելով ՆԱՏՕ-ի գագաթնաժողովին՝ Արևմուտքը ցանկանում է նրանց կտրել Ռուսաստանի հետ համագործակցությունից, Կովկասում իրենց բաղադրատոմսերի պարտադրումը հանգեցնում է տարածաշրջանում նոր բաժանարար գծերի ի հայտ գալուն։ Այս մասին ճեպազրույցում հայտարարել է ՌԴ ԱԳՆ տեղեկատվության և մամուլի դեպարտամենտի փոխտնօրեն Անդրեյ Նաստասինը, փոխանցում է ՏԱՍՍ-ը։

«Ամերիկացիների փորձերի ևս մեկ օրինակ՝ իրենց ապակառուցողական ազդեցությունը տարածելու աշխարհի բոլոր տարածաշրջաններում։ Եվրոպայում թուլակամ արբանյակների հետ Վաշինգտոնը խնդիր է դնում պոկել մեր ընկերներին և հարևաններին Ռուսաստանի հետ համագործակցությունից։ Եվրատլանտականների կողմից տարածաշրջանի առանձնահատկությունները հասկանալուց հեռու իրենց բաղադրատոմսերի պարտադրումը հանգեցնում է նոր բաժանարար գծերի առաջացմանը Հարավային Կովկասում, ինչը կործանարար հետևանքներ կունենա ոչ միայն այս տարածաշրջանի, այլև համաեվրասիական անվտանգության համար։ Հուսով ենք՝ Բաքուն ու Երևանը դա լավ հասկանում են»,- ասել է նա։

Ըստ ռուսաստանցի դիվանագետի՝ Մերձբալթյան երկրներն ամբողջ ուժով ձգտում են Հայաստանը «պոկել» Ռուսաստանից և հետխորհրդային տարածքում ինտեգրացիոն գործընթացներից, և Հարավային Կովկասում ծայրահեղ կործանարար գիծ են տանում»։

«Ինչ վերաբերում է Հարավային Կովկասին, ապա Տալլինը, Ռիգան և Վիլնյուսը ծայրահեղ կործանարար գիծ են տանում այնտեղ։ Ամբողջ ուժով փորձում են «պոկել» Հայաստանը Ռուսաստանից, օտարել նրան մեր ընդհանուր ինտեգրացիոն մեխանիզմներից, այդ թվում՝ ՀԱՊԿ-ից, Երևանին զբաղեցնել եվրատլանտյան հեռանկարով»,- ասել է Նաստասինը։