Ապօրինի ծագում ունեցող գույքի բռնագանձման պահանջով երկրորդ վճիռն է կայացվել

Հակակոռուպցիոն դատարանի վճռով նախատեսվում է Գագիկ Ծառուկյանի աղջկանից՝ Ռոզա Ծառուկյանից և փեսայից՝ Աբովյան համայնքի նախկին ղեկավար Կարապետ Գուլոյանից հօգուտ Հայաստանի բռնագանձել ավելի քան 1 մլրդ 286 մլն դրամ, 264 հազար ԱՄՆ դոլարի պահանջի իրավունք, 2 անշարժ գույք և բաժնեմասեր։

Ավելի քան երկու տարի Հակակոռուպցիոն դատարանում՝ դատավոր Նարինե Ավագյանի նախագահությամբ քննվեց Ապօրինի ծագում ունեցող գույքի բռնագանձման վարչության կողմից ներկայացված հայցադիմումը։ Ըստ որի, Գուլոյան ընտանիքից պետականացման է ենթակա մեկ բնակելի տուն և մեկ հողամաս Կոտայքի մարզում, 2 ընկերությունում՝ «ԱԿԲԱ բանկ» ԲԲԸ-ում և «Էլեկտրոմոնտաժ» ՍՊԸ-ում ունեցած բաժնետոմսերը, 1 մլրդ 638 մլն 557 հազար դրամ բարեխիղճ ձեռք բերողին փոխանցված գումար և 58 մլն 120 հազար ապօրինի եկամտի մնացորդ:

Այս վճիռը, ըստ Դատական իշխանության կայքէջի, բռնագանձման պահանջով երկրորդն է։

Նշենք՝ Կարապետ Գուլոյանին անցնում է նաև քրեական գործով, նրա նկատմամբ հանրային քրեական հետապնդում էր սկսվել նախորդ տարվա սեպտեմբերին։ Ըստ Գլխավոր դատախազության՝ Աբովյան համայնքի նախկին ղեկավարի կողմից առերևույթ կատարված հանցավոր արարքների հետևանքով համայնքին պատճառվել է 537 մլն 802 հազար 150 դրամի գույքային վնաս, որից 474 մլն 949 հազար 600 դրամը նախաքննության ընթացքում վերականգնվել է:

«Պարզվել է, որ 2008-2015 թթ Աբովյան համայնքի ղեկավարի պաշտոնը զբաղեցրած Կարապետ Գուլոյանը, տեղյակ լինելով օրենսդրական արգելքի մասին` խախտել է մի շարք իրավական ակտերի պահանջներն ու օտարել օտարման ոչ ենթակա հողատարածքներ»,- մանրամասնել է Դատախազությունը։