Ադրբեջանը ՌԴ-ի հետ պայմանավորվել է՝ Արևմուտքին չթողնել ռեգիոն․ Ալիևը Պուտինի հետ պայմանը չի խախտի՝ քանի Ուկրաինայում պատերազմ է․ Բորիս Նավասարդյան. ՏԵՍԱՆՅՈՒԹ

Այսօր Ադրբեջանում է ԱՄՆ Պետքարտուղարի տեղակալ Ջեյսմ Օ’Բրայանը, որն արդեն հանդիպել է Ալիևի, Բայրամովի հետ։ Նրա օրակարգի գլխավոր հարցը Հայաստանի և Ադրբեջանի միջև խաղաղության պայմանագրի ստորագրումն է։ Օրերս Ալիևի հետ զրուցել է նաև պետքարտուղար Անտոնի Բլինքենը՝ ընդգծելով Հայաստանի հետ անհապաղ պայմանագրի ստորագրման անհրաժեշտությունը։

«Նախագահ Ալիևի հետ մենք շատ հստակ ենք, որ խաղաղության ժամանակն է»,- Ներկայացուցիչների պալատում հայտարարեց ԱՄՆ պետքարտուղարի տեղակալ Ջեյմս Օ’Բրայանը։ Եթե Ադրբեջանը չհամաձայնվի կնքել խաղաղության պայմանագիր, կխափանի ահա այս ծրագիրը, որը նկարագրել է Ջեյմս Օ’Բրայանը․ «Խաղաղությունը ոչ միայն Ադրբեջանի, այլև տարածաշրջանի և Կենտրոնական Ասիայի խնդիրն է։ Այս երկրները ներկայումս արտահանում են Չինաստանի կամ Ռուսաստանի տարածքով, բայց որպես այլընտրանքային ճանապարհ՝ արտահանումը կարող է իրականացվել Ադրբեջանի տարածքով։ Մի երթուղին անցնում է Վրաստանի միջով դեպի Սև ծով, բայց մեկ այլ՝ ավելի լայն ճանապարհ կարող է անցնել Ադրբեջանով, Հայաստանով և Թուրքիայով: Հետևաբար, մեզ անհրաժեշտ է խաղաղության պայմանագիր Ադրբեջանի և Հայաստանի միջև՝ վերջ դնելու այս սարսափելի հակամարտությանը, որը շարունակվում է 1990-ականներից ի վեր։ Ժամանակն է ստորագրել խաղաղության պայմանագիրը և վերացնել պատերազմի հետևանքները»,- հայտարարել է Օ’Բրայանը։ Քաղաքական վերլուծաբան Բորիս Նավասարդյանը Factor TV-ի հետ զրույցում պնդում է, որ Ադրբեջանը հակված չէ ՀՀ-ի հետ ստորագրել պայմանագիր, որը կկապի իր ձեռքերը, որպեսզի ինքը ճնշում գործադրի ՀՀ վրա և զիջումներ կորզի․

«Ադրբեջանն ուզում է՝ վախի մեջ մնա ՀՀ-ն, այստեղ մտածենք, որ պատերազմը հնարավոր է ամեն պահի։ Ադրբեջանը ՌԴ-ի հետ պայմանավորված է՝ Արևմուտքին չթողնել ռեգիոն, և քանի ուկրաինական ռազմաճակատում անորոշություն կա, Ալիևը չի խախտի Մոսկվայի հետ այդպիսի պայմանավորվածությունը։ Ադրբեջանը ձգտում է դոմինացիայի ռեգիոնում՝ Արևմուտքին ներս չթողնել, ինչը ընդունելի է Մոսկվայի համար։ ՌԴ-ն օգնելու է նրան, որ ռեգիոն չգան ԱՄՆ-ն և ԵՄ-ն։ Ադրբեջանի մեղադրանքը Ֆրանսիայի դեմ, որ զինում է ՀՀ-ին, խաղ է, քանի որ Բաքվում գիտեն, որ ՀՀ-ն տարածքային պահանջ չի կարող ունենալ, ռևանշիզմից խոսելը անիմաստ է, և այդ մեղադրանքների ոճը ճնշման ձև է ՀՀ-ի և Արևմուտքի վրա։ ՀՀ-ն կունենա անվտանգություն՝ Արևմուտքի հետ սերտացնելով գործակցությունը պրակտիկ առումով․ Արևմուտքի հիմնական գործընկեր դառնալու շանս կա։ Բայց նաև՝ ՀՀ-ն Արևմուտքի հետ կխորացնի գործակցությունը, եթե իջեցնի ՌԴ-ի հետ հարաբերության մակարդակը»,- նշեց Բորիս Նավասարդյանը։

Հարցազրույցն ամբողջությամբ՝ տեսանյութում։

Ռոբերտ Անանյան