Հասարակություն
26.06.2024 | 16:55
Կառավարությունը Լոռու և Տավուշի մարզերում հեղեղումներից տուժած ագրոպարենային ոլորտում գործունեություն իրականացնող տնտեսավարողների վարկային արտոնություն կտրամադրի։ Հարցn ընդգրկված է մայիսի 27-ի կառավարության օրակարգի չզեկուցվող հարցերի փաթեթում։
Կառավարությունը աղետի գոտում տուժած ագրոպարենային ոլորտում գործունեություն իրականացնող տնտեսավարողներին կաջակցի վարկի մարման ժամկետը երկարաձգելու, մայր գումարի կամ տոկոսադրույքի մարման համար լրացուցիչ արտոնյալ ժամկետ տրամադրելու հարցում։
Հիմնավորման համաձայն՝ այն տնտեսվարողները, որոնք հեղեղումների պատճառով ունեցել են տվյալ վարկի մասով հանրագումարային վաթսուն օրվանից ավելի ժամկետանց պարտավորություններ մինչև վարկի մարման կամ արտոնյալ ժամկետի ավարտը դիտարկվում են որպես ծրագրի շահառուներ։
Կառավարության նման որոշման ընդունումը պայմանավորված է հեղեղումների պատճառով հայտարարված աղետի գոտիների տարածքներում ագրոպարենային ոլորտում գործունեություն իրականացնող տնտեսավարողների մոտ առաջացած խնդիրներով, նրանք այդ օրերին հնարավորություն չեն ունեցել կատարելու վարկի հերթական վճարումը կամ մարումը։
Կառավարությունն ակնկալում է, որ ծրագիրը հնարավորություն կտա ֆինանսական կառույցներին երկարաձգելու շահառուների վարկի մարման ժամկետը, ինչպես նաև վարկի մայր գումարի կամ տոկոսադրույքի մարման համար սահմանված արտոնյալ ժամկետը, և արդյունքում՝ դժվարին իրավիճակում հայտնված շահառուները հնարավորություն կունենան շարունակել իրենց գործունեությունը և մարել վարկային պարտավորությունները։
Հիշեցնենք, որ կառավարության որոշմամբ Լոռու մարզի 6 և Տավուշի մարզի 3 համայնքներ աղետի գոտի են ճանաչվել․ խոսք, ընդհանուր առմամբ, 39 բնակավայրի մասին է: Աղետի գոտի հռչակված համայնքներում ընդգրկված են այն բնակավայրերը, որոնք մայիսի 25-26-ը տուժել են Դեբեդ և Աղստև գետերի վարարումների հետևանքով:
