Արևմուտքի հետ ռազմական դաշինք կլինի, երբ ՀՀ-ն վերջ դնի ՌԴ-ի հետ շփմանը, երբ ՊՆ-ում և ԱԱԾ-ում ռուս սպաներ չեն լինի․ Հրաչյա Արզումանյան․ ՏԵՍԱՆՅՈՒԹ

Հայ-ամերիկյան շփումներն աննախադեպ ակտիվացել են։ Վերջին շաբաթվա ընթացքում Հայաստան են ժամանել ԱՄՆ Պետքարտուղարի երկու տեղակալներ։ Հունիսի 10-ից 12-ը Երևանում էր Էնթոնի Բլինքենի՝ Եվրոպայի և Եվրասիայի հարցերով օգնական Ջեյմս Օ’Բրայենը։ Իսկ հունիսի 17-ին և 18-ին Երևանում է ԱՄՆ Պետքարտուղարի՝ կառավարման և ռեսուրսների հարցերով տեղակալ Ռիչարդ Վերման։ Նա ասել է, որ Հայաստանում քննարկումների արդյունքում ԱՄՆ-ն ուզում է ունենալ ճանապարհային հստակ քարտեզ, թե «ինչպես կարող ենք առաջընթաց գրանցել խաղաղության և բարգավաճման, տնտեսության, առևտրի, մարդկանց միջև շփումների ոլորտներում»։ Հայաստանն ու ԱՄՆ-ն որոշում կայացրին երկու երկրների միջև ռազմավարական երկխոսությունը բարձրացնել նոր՝ Ռազմավարական գործընկերության հանձնաժողովի մակարդակի, ինչպիսին առկա է ԱՄՆ-ի և Իսրայելի միջև։ Ֆրանսիան  իր հերթին ռազմական տեխնիկա է վաճառում ՀՀ-ին,  ԱՄՆ-ն և Ֆրանսիան նաև խորհրդատուներ ունեն ՀՀ ՊՆ-ում՝ բանակի բարեփոխումներին մասնակցելու։

Ազգային անվտանգության և ռազմական հարցերով փորձագետ, քաղաքագիտության դոկտոր Հրաչյա Արզումանյանը Factor TV-ի հետ զրույցում ասում է, որ Արևմուտքի և Հայաստանի շահերը համընկել են, և այս պատուհանից պաշտոնական Երևանը պետք է օգտվի․

«Մենք տեսնում ենք, որ ԱՄՆ-ն և Ֆրանսիան հզորացնում են ՀՀ-ին, որի վրա նրանք կհիմնվեն այս ռեգիոնում։ Մենք պարտավոր ենք ՀԱՊԿ-ից և ԵՏՄ-ից դուրս գալ։ Պետք է որպես սպառնալիք դիտարկել է ՌԴ-ի և Ադրբեջանի մեղադրանքը Ֆրանսիային, թե իբր պատերազմ է հրահրում Հայաստանին զենք վաճառելով։ Պարզապես՝ Ռուսաստանը գիտի, թե ՀՀ-ից դուրս գալով՝ ինչպիսի պրոբլեմներ է ինքը ստանում։ Արևմուտքի հետ ռազմական դաշինք կլինի, երբ ՀՀ-ն վերջ կդնի ՌԴ հետ շփմանը, երբ ՊՆ-ում և ԱԱԾ-ում ռուս սպաներ չլինեն»,- նշեց փորձագետը։ Նա անբավարար է գնահատում ՀՀ իշխանության այն գործելաոճը, երբ ՀԱՊԿ-ի ուղղությամբ արվում են քննադատական հայտարարություններ, սակայն ռուսական ինտեգրացիոն միավորները լքելու իրական քայլ չի արվում։

Հարցազրույցն ամբողջությամբ՝ տեսանյութում։

Ռոբերտ Անանյան