Ադրբեջանը զինում է Քարվաճառի տարածքը՝ ՀՀ-ի դեմ ագրեսիայի պլացդարմ դարձնելով, վտանգավոր են զիջումները․ Տաթևիկ Հայրապետյան․ ՏԵՍԱՆՅՈՒԹ

Բաքուն պահանջում է Հայաստանից փոխել Սահմանադրությունը, պնդելով, թե առանց դրա խաղաղության պայմանագրի կնքումն ուղղակի անհնար կլինի։ Խնդրահարույց են համարում Հայաստանի Սահմանադրության հղումը Անկախության հռչակագրին, որը հենվում է «Խորհրդային Հայաստանի ու Լեռնային Ղարաբաղի վերամիավորման մասին» որոշման վրա: Բաքուն այստեղ տարածքային պահանջներ է տեսնում։ Ալիևն է վերջերս սա բարձրաձայնել։ Ինչո՞ւ է Ադրբեջանը ՀՀ-ին Սահմանադրություն փոխելու պահանջ ներկայացնում, եթե խաղաղության պայմանագրի համաձայնեցված տեքստում կա նշում, որ կողմերը չեն կարող հղում անել ներքին օրենսդրությանը՝ պայմանագրի կատարումից խուսափելու նպատակով։

Ադրբեջանի հարցերով փորձագետ, պատմագիտության թեկնածու Տաթևիկ Հայրապետյանը Factor TV-ի հետ զրույցում ասում է, որ սա զուտ պատրվակ է Ադրբեջանի համար՝ տապալելու պայմանագրի ստորագրման գործընթացը։

«Ադրբեջանը պատերազմով է հարցեր լուծում, և շատաժով և սպառնալիքով զիջումներ է ստանում, ինչից հետո նոր պահանջ է ներկայացնում, օրինակ՝ փոխել Սահմանադրությունը։ Նրանց ձեռնտու չէ թուղթ ստորագրել, երբ ուժի սպառնալիքով և հոգեբանական տեռորով հասնում են զիջում ստանալուն։ Ադրբեջանում նոր պատերազմ է քարոզվում պետական հեռուստաընկերություններով։ Ալիևին չպետք է միակողմանի զիջել, ինչից ոգևորվում է և տապալում պայմանագրի ստորագրումը, թուղթ ստորագրելու շահագրգռվածություն չունի»,- նշեց Հայրապետյանը։

Վերջին շրջանում Ադրբեջանի ՊՆ-ն պարբերաբար տեղեկատվություն է տարածում, թե, իբր, ՀՀ-ն խախտել է հրադադարի ռեժիմը։ Թե՛ ՀՀ-ն, թե՛ ԵՄ-ն սա հերքում են։ Փաշինյանը առաջարկեց Բաքվին հրադադարի ռեժիմի խախտման հետաքննության երկկողմ մեխանիզմ ձևավորել։  «Հայաստանի Հանրապետության վարչապետի աշխատակազմն առաջարկում է մեկնարկել նշված մեխանիզմի գործնականացման աշխատանքները», – ասված է հայկական կողմի հաղորդագրությունում:

Միաժամանակ, ԱՄՆ պետքարտուղար Էնթոնի Բլինքենը Ադրբեջանի նախագահ Իլհամ Ալիևին կոչ է արել անհապաղ կնքել խաղաղության համաձայնագիր Հայաստանի հետ։ Հեռախոսազրույցում քննարկվել է Հայաստան-Ադրբեջան կարգավորման գործընթացը։ «Պետքարտուղարը կրկնել է, որ ԱՄՆ-ն հավատարիմ է մնում հետագա ներգրավվածության աջակցմանը ցանկացած ձևով, որը օգտավետ է կողմերի համար»,- ասվում է հաղորդագրության մեջ։ Բլինքենը շեշտել է, որ ԱՄՆ-ն հանձնառու է օգնել COP29-ի հաջողությանը: Նա կոչ է արել նորացնել և ամրապնդել երկկողմ հարաբերությունները ԱՄՆ-ի և Ադրբեջանի միջև։ Ադրբեջանագետը հիշեցնում է նաև Ռուսաստանի և Ադրբեջանի՝ Ֆրանսիայի և ԱՄՆ-ի դեմ սպառնալից հռետորաբանության մասին։

«Բլինքենի՝ Ալիևին զանգից հետո Ադրբեջանի մամուլը սկսեց պատերազմով սպառնալ, ԱՄՆ-ին ասում են՝ գործ չունեք այստեղ։ Եվ եթե Վաշինգտոնը ընդունում է խաղի այս կանոնը, դա է անընդունելի։ Քանի դեռ ԱՄՆ-ն չի պատժել Ադրբեջանին՝ իր հետ հաշվի չի նստի։ Ալիևը վտանգավոր ական է դնում աշխարհի համար, պատերազմով հարցեր է լուծում, ԱՄՆ-ն սա չպիտի՛ ընդունի։ Ադրբեջանը զինում է Քարվաճառի տարածքը՝ ՀՀ-ի դեմ ագրեսիայի պլացդարմ դարձնելով, վտանգավոր են միակողմանի զիջումները»,- ասում է Տաթևիկ Հայրապետյանը։

Հարցազրույցն ամբողջությամբ՝ տեսանյութում։

Ռոբերտ Անանյան