Քաղաքականություն
20.06.2024 | 20:00Քաղաքական 4 ուժերի միավորող Հայաստանի «Ժողովրդավարական ուժերի» հարթակն առաջարկում է իշխանություններին հանրաքվե անցկացնել ԵՄ-ին անդամակցելու հարցով։ Նախաձեռնողները հստակ ժամկետ են նշում՝ առաջիկա 3-4 ամիսներին։ Նաև ԱԺ-ում լսումներ են հրավիրվել այս հարցով։
Մինչ այդ՝ ամիսներ առաջ, վարչապետ Նիկոլ Փաշինյանը Եվրախորհրդարանի նիստում ասաց՝ ՀՀ-ն պատրաստ է ԵՄ-ին մոտ լինել այնքան, ինչքան ԵՄ-ն հնարավոր կհամարի։ Կրկնելով նույն միտքը՝ ՀՀ ԱԳ նախարար Արարատ Միրզոյանը նշել է նաև, որ Հայաստանի ժողովուրդը և կառավարությունը ունեն եվրոպական ձգտումներ։ Ի պատասխան, եվրոպական խորհրդարանը ընդունած բանաձևում Եվրահանձնաժողովին կոչ է արել՝ ՀՀ-ի հետ անդամակցության շուրջ բանակցություն սկսել։ Ու թեև ՀՀ վարչապետը օրերս կես կատակ կես լուրջ ասում էր, որ կուզենար ՀՀ-ն այս տարի դառնար ԵՄ-ի անդամ դառնալ, կառավարող «Քաղաքացիական պայմանագիր» կուսակցությունը այդ ուղղությամբ կոնկրետ քայլեր չի արել։ Ըստ Հանրաքվեի մասին ՀՀ օրենքի՝ վերպետական միջազգային կազմակերպություններին Հայաստանի Հանրապետության անդամակցության հարցը դրվում է հանրաքվեի։
Մինչդեռ, ԵՄ-ի Արևելյան գործընկերության 6 երկրներից 3-ը՝ Ուկրաինան, Մոլդովան, Վրաստանը ստացել են ԵՄ անդամի թեկնածուի կարգավիճակ, և հավանական է՝ առաջին երկուսի հետ սկսվեն բանակցություններ՝ անդամակցելու թեմայով։ «Օտարերկրյա գործակալների մասին» օրենքի ընդունումը սառեցրել է Վրաստանի ինտեգրումը Եվրամիությանը՝ ասել է Թբիլիսիում ԵՄ դեսպանը։
Ո՞րն է Հայաստանի ընտրությունը՝ դառնա՞լ ԵՄ-ի անդամ, թե՞ օրինակ որդեգրել՝ «և՛,և՛»-ի քաղաքականությունը ինչպես 10 տարի առաջ, փորձել հավասար լավ հարաբերություն ունենալ Արևմուտքի և Հյուսիսի հետ։ ԵՄ անդամի թեկնածության հայտ ներկայացնելու դեպքում ինչպիսին են անդամակցելու ՀՀ-ի շանսերը։
Այս և այլ հարցերի շուրջ Factor TV-ի տաղավարում հրավիրել ենք բանավեճ, որին մասնակցում են Կարեն Սարգսյանը՝ սոցիոլոգ, Հարություն Մկրտչյանը՝ քաղաքագետ, Լիլիթ Դալլաքյանը՝ քաղաքագետ, Անի Սամսոնյանը՝ քաղաքական գործիչ, Վարդան Խաչատրյանը՝ Միացյալ Հայաստան կուսակցության փոխնախագահ։
