Ոստիկանությունը ծեծով, հայհոյանքներով ահաբեկում է մարդկանց՝ շարժումից հետ պահելու․ ռեպրեսիոն մեքենա է գործում․ Տիգրան Աբրահամյան. ՏԵՍԱՆՅՈՒԹ

Երեկ ընդդիմության հրավիրած արտահերթ նիստին իշխանական պատգամավորները չեկան, գրանցվել էր ընդամենը 34 պատգամավոր, քվորում չապահովվեց։ Փաստացի, ընդդիմությունn առաջ էր քաշել կառավարությանը ուղղված ուղերձի նախագիծ և ոչ թե իմպիչմենտի գործընթաց, որի հաջողումը կնշանակի Փաշինյանի հեռացում, մինչդեռ՝ ուղերձը չունի պարտադիր հետևանք։ Թեև՝ դա էլ չստացվեց։

ՀՀ ԱԺ«Պատիվ ունեմ» խմբակցության քարտուղար Տիգրան Աբրահամյանին հարց ուղղեցինք, թե ինչպես են 20 ՔՊ-ականի համոզելու դեմ դուրս գալ Փաշինյանին, եթե քաղաքական իմաստով ընդդիմությունը ունի պառակտում, քանի որ չեն կարողացել ապահովել 36 ընդդիմադիր պատգամավորների ստորագրությունը։

ՀՀԿ-ական պատգամավորն ասում է, որ իրենց կուսակցությունը անկեղծ պայքար է մղում ՀՀ ներկա իշխանության դեմ, և չի խուսափում իրենց ուղղվող հարվածներից։ Ըստ նրա՝ միանշանակ չէ, որ ընդդիմությանը չի հաջողելու իշխանական պատգամավորների աջակցությունն ստանալու հարցում․

«ՀՀԿ-ն այնտեղ է, ուր կա անկեղծ պայքար, դիմադրություն այս իշխանությանը, հարվածներից չենք խուսափում։ ՔՊ-ում կարող է հրմշտոց սկսվել՝ Փաշինյանի իմփիչմենթին միանալու համար։ Մենք մի դրվագից վատատես չենք դառնա, իշխանությունը անում է ամենը՝ հիասթափեցնելու մարդկանց։ Իշխանությունը սպառնում է համայնքներում՝ աշխատանքից հեռացման ձևով, ոստիկանությունը ծեծի, հայհոյանքների միջոցով ահաբեկում է մարդկանց, հետ պահելու շարժումից, դաժան խոշտանգումներ են անում, ռեպրեսիոն մեքենա է գործում»։

Տիգրան Աբրահամյանը պնդեց նաև, որ Բագրատ Գալստանյանի ղեկավարած շարժումը կապ չունի Ռոբերտ Քոչարյանի՝ 2022-ին նկարագրած սցենարի հետ, ըստ որի՝ հեղինակություն ունեցող հոգևորական առաջնորդը կարող է միավորել ընդդիմադիր մարդկանց՝ հակաիշխանական պայքար մղելու համար։ ՀՀԿ-ական պատգամավորը նշեց նաև, որ ընդդիմադիր շարժումը տրանսֆորմացիայի գործընթաց է մտել, ինչը ըստ նրա՝ տուն գնալու հետ կապ չունի․ «Մարզեր գնալը մարման ցուցիչ չէ»։

Հարցազրույցն ամբողջությամբ՝ տեսանյութում։

Ռոբերտ Անանյան