Թեհրանին ու Մոսկվային անհրաժեշտ է համագործակցել Կովկասի հարցերում, որը երկու երկրների շահերի գոտի է․ Իրանի ԱԳ նախարարի պաշտոնակատարը՝ Խովաևին

Իրանի ԱԳ նախարարի պաշտոնակատար Ալի Բաղերի Կանին նախօրեին Թեհրանում ՌԴ ԱԳՆ հատուկ ներկայացուցիչ Իգոր Խովաևի հետ հանդիպմանն ընդգծել է Ադրբեջանի և Հայաստանի միջև խնդիրների լուծման անհրաժեշտությունը՝ կոչ անելով Թեհրանին և Մոսկվային համագործակցել Կովկասի տարածաշրջանում իրենց շահերին համապատասխան, հաղորդում է Mehr գործակալությունը։

Խոսելով տարածաշրջանային և միջազգային կարևոր հարցերի շուրջ երկու երկրների դիրքորոշումների նմանության մասին՝ Քանին կովկասյան տարածաշրջանն անվանել է երկու երկրների ազգային անվտանգության և շահերի գոտի ու ընդգծել երկու երկրների համագործակցության անհրաժեշտությունը։

«Կովկասյան տարածաշրջանում ընթացող զարգացումների կարևորությունն ու զգայունությունը, հատկապես օտար ուժերի միջամտության աճի միտումը պահանջում է ռազմավարական համակարգում և շարունակական խորհրդակցություններ Իրանի և Ռուսաստանի պաշտոնյաների միջև։ Այս առումով տարածաշրջանային մեխանիզմների ներուժի առավելագույն օգտագործումը, ինչպիսին է 3+3 հարթակը, տարածաշրջանում առկա խնդիրների լուծման, տարածաշրջանային համագործակցության և մերձեցման ընդլայնման համար, կարևոր են կովկասյան տարածաշրջանի երկրների անվտանգության ու կայունության համար»,- ասել է Բաղերին։

Խովաևն իր հերթին իրանական կողմին է ներկայացրել Կովկասյան տարածաշրջանում խաղաղության և կայունության հաստատմանն ուղղված իր երկրի դիվանագիտական ​​ջանքերը և ՌԴ-ի տեսակետը Կովկասի տարածաշրջանի զարգացումների վերաբերյալ։