Այս բախումներով ՌԴ-ն քաղաքացիական պատերազմի, քաոսի մթնոլորտ է ստեղծում ՀՀ-ում․ իշխանափոխությունը չէ նպատակը․ Տիգրան Խզմալյան․ ՏԵՍԱՆՅՈՒԹ

Երեկ երեկոյան ոստիկանությունը հատուկ միջոցներ է կիրառել, ըստ ԱՆ-ի՝ այսօր 09։30-ի դրությամբ, Բաղրամյանի իրադարձությունների հետևանքով բուժօգնության է դիմել 101 քաղաքացի և ոստիկան, 85-ը դուրս է գրվել։ ՆԳՆ-ն տեղեկացրել է, որ վիրավորում է ստացել 16 ոստիկան։ Ոստիկանության կողմից հատուկ միջոցների կիրառմանը նախորդել էր լարվածությունն ԱԺ-ի դահլիճում և ակցիայի վայրում։ Նախ, Նիկոլ Փաշինյանն իրեն հատուկ էմոցիոնալ տոնով ԱԺ-ում հայտարարեց , որ դասալիք գեներալները պետք է բանտում լինեն։ Ինչից հետո լեզվակռիվ սկսվեց իշխանական և ընդդիմադիր պատգամավորների միջև, այդ ընթացքում ԱԺ նախագահը որոշեց դադարեցնել նիստի հեռարձակումը։

Բագրատ Գալստանյանն այդ պահին դրսում ցուցարարներին ասաց, թե ներսում բախումներ են, և ոստիկանությունը թույլ չի տալիս ԱԺ ընդդիմադիր պատգամավորներին ներս մտնել։ Այնուհետև, ցուցարարների մի մասը հոսքով շարժվեցին դեպի ոստիկանական պատնեշը՝ նրանց առջևում ընդդիմադիր պատգամավորները։ Ցուցարարների մի մասը պարսպի վրայով մտավ Դեմիրճյան փողոցին հարակից Սիրահարների այգի։ Ինչից հետո ոստիկանությունը կիրառեցին հատուկ միջոցներ, ինչը ըստ որոշ իրավապաշտպանները ոչ համաչափ է եղել։

Հայաստանի Եվրոպական կուսակցության ղեկավար Տիգրան Խզմալյանը Factor TV-ի հետ զրույցում տեսակետ է հայտնում, որ նախօրեին Դեմիրճյան-Բաղրամյան խաչմերուկում տեղի ունեցած բախումներն ունեն աշխարհաքաղաքական երանգ և նշանակություն․ «Այս բախումներով Պուտինին նվեր արեցին, հունիսի 12-ին ՌԴ-ի օրն էր․ ջոկատներ, դիվերսանտներ էին ուղարկում Հայաստան, և այս ամենը կանխատեսելի էր։ Այս բախումներով ՌԴ-ն քաղաքացիական պատերազմի, քաոսի մթնոլորտ է ստեղծում ՀՀ-ում, իշխանափոխությունը չէ նպատակը»։

Տիգրան Խզմալյանը պնդում է, որ Մոսկվան հրաժեշտ է տվել Գալստանյանին՝ նկատի ունենալով, որ քաղաքական արդյունք չկա․ «Այս շարժումը մարում է, նոր հարձակումը հոկտեմբերին կլինի՝ նոր ղեկավարով։ Մենք այս սցենարը կարող ենք կանխել՝ ԵՄ անդամակցելու հանրաքվեով»։

Հարցազրույցն ամբողջությամբ՝ տեսանյութում։

Ռոբերտ Անանյան