28.03.2026 | 23:47
ՔՊ քվեարկություն․ առաջատար 10-յակը և ամենաքիչ ձայներ հավաքած թեկնածուն
Ահաբեկչության վտանգ կա՝ ՀՀ-ում քաոս ստեղծելու․ Լիլիթ Դալլաքյան․ ՏԵՍԱՆՅՈՒԹ
Քաղաքականություն
12.06.2024 | 21:00
Նիկոլ Փաշինյանի հրաժարականը պահանջող Բագրատ արքեպիսկոպոս Գալստանյանն այսօր մարդկանց հրավիրել էր Բաղրամյան պողոտա՝ իր սկսած պայքարն ավարտին հասցնելու համար։ Իշխանությանը տված ժամանակը լրացավ այսօր, իսկ թե ինչ է լինելու դրանից հետո, փակագծեր չի բացել։
Վարչապետը ԱԺ-ում էր՝ հարցուպատասխանի։ Ցուցարարները փորձ արեցին անցնել Դեմիրճյան փողոց, որպեսզի արգելափակեն Փաշինյանի ճանապարհը՝ թույլ չտալու դուրս գալ ԱԺ շենքից, սակայն դա չստացվեց ոստիկանության գործողությունների արդյունքում։
Ինչքանո՞վ իրագործելի է ԱԺ-ի շենքի մոտ վրաններ տեղադրած ընդդիմության այս օրակարգը՝ ԱԺ-ն նիստ գումարի կառավարության հրաժարականի և նոր կառավարության ձևավորման օրակարգով։
Քաղաքագետ Լիլիթ Դալլաքյանը Factor TV-ի հետ զրույցում պնդում է, որ դա ընդդիմության համար անլուծելի խնդիր է։ Սակայն նա բախումների և անկայունություն ստեղծելու վտանգ է տեսնում։
«Ահաբեկչության վտանգ կա, որպեսզի Հայաստանում քաոս ստեղծեն, որ ժողովուրդն ասի՝ Փաշինյանը չի կարողանում կառավարել, և նրա դեմ դժգոհություն առաջանա։ Փաշինյանը մեղավոր է այն բանում, որ չպատժեց այս շարժումը ֆինանսավորողներին՝ գողեր են, որոնք բանտում պիտի լինեն։ Եթե Փաշինյանը փոխվի, Գալստանյանը գա և ասի՝ սահմանազատումը դադարեցնում է, դա պատերազմի է տանելու։ Ալիևը հարձակվելու է։ Մենք զենքեր ունե՞նք, պատրա՞ստ ենք»,- ասաց նա։
Քաղաքագետը տեսնում է նաև ՌԴ-ի շահագրգռությունը՝ հայ-ադրբեջանական բախումների և պատերազմական իրադրության շարունակման հարցում, որպեսզի կոնֆլիկտը ձգձգվի, ինչը թույլ կտա իրեն մնալ ռեգիոնում։ Այս իմաստով՝ Դալլաքյանը պատասխան քայլերի կարիք է տեսնում ՀՀ իշխանության կողմից։
«Փաշինյանը պիտի մերկացնի Պուտինի քաղաքականությունը ՀՀ-ի դեմ, և պետք է բացահայտ ասի, որ ՌԴ-ն է հրահրել Ադրբեջանին մեր դեմ պատերազմի, զինել է մեր դեմ։ Ռուսաստանի աչքի առաջ է տեղի ունեցել էթնիկ զտումը։ Երբ այս ամենն ասվի, ռուսամետ ուժերն էլ քաղաքական ասպարեզից դուրս կմղվեն։ Եթե Փաշինյանն ԱՄՆ-ի հետ մերձեցման չգնա, ՀՀ պետականությունը կոչնչանա։ Մենք չպիտի շարունակենք մնալ ՌԴ-ի ազդեցության տակ, և չպիտի վախենանք ռուսների ջղայնանալուց»,- նշեց քաղաքագետը։
Հարցազրույցն ամբողջությամբ՝ տեսանյութում։
Ռոբերտ Անանյան
