14.09.2026 | 15:21
Չենք կարող բացառել, որ էսկալացիան կազդի նաև մեր տարածքի վրա․ Լեհաստանի վարչապետը՝ ռուսական հարվածների մասին
11 մլն դրամ կրիպտոեկամուտ և պետական աջակցություն ստացող ընտանեկան բիզնես․ Տիգրան Ավինյանի հայտարարագիրը. ՏԵՍԱՆՅՈՒԹ
Հասարակություն
11.06.2024 | 19:45
Երևանի քաղաքապետ Տիգրան Ավինյանն անցած տարի 45․4 մլն դրամ եկամուտ է ունեցել։ Նրա 2023 թ-ի գույքի և եկամուտների հայտարարագրից տեղեկանում ենք, որ այս գումարից 20 մլն դրամը Երևանի քաղաքապետարանից աշխատավարձն է, 14 մլն դրամը ստացել է Երևանի Կենտրոնում գտնվող ավտոտնակի վաճառքից։ Հետաքրքիր է, որ դրա գնորդը «Զեյթուն քոնսթրաքշն» ՍՊԸ-ի լիազոր ներկայացուցիչ «Երևանի կառուցապատման ներդրումային ծրագրերի իրականացման գրասենյակ» ՀՈԱԿ-ն է, որը համայնքային կառույց է։ Մնացած 11․3 մլն դրամը քաղաքապետը ստացել է Poolin կրիպտոմայնինգի հարթակից։
Ավինյանի հայտարարագրած կրիպտոարժույթներից Bitcoin-ի ծավալը 2023 թ-ին կրկնապատկվել է՝ դառնալով 3.62։ Նկատենք, որ 1 Bitcoin-ն այս պահին արժե մոտ 70 հազար ԱՄՆ դոլար։ Քաղաքապետի մյուս կրիպտոարժույթները տարվա ընթացքում նույնությամբ պահպանվել են՝ ADA Cardano՝ 1,483, Ethereum 5։ Տարեվերջին նրա բակային հաշվին եղել է 16․6 մլն դրամ, կանխիկ հայտարարագրել է 17․8 մլն դրամ։
Երևանի քաղաքապետն 90 օրից ավելի բնակվել է իրեն չպատկանող առանձնատանը։ Վարում է 2022 թ-ին հորից նվեր ստացած VOLKSWAGEN մակնիշի ավտոմեքենան։
Ավինյանը «Հայաստանի ազգային պոլիտեխնիկական համալսարան» և Հայաստանի վերականգնվող էներգետիկայի և էներգախնայողության հիմնադրամների հոգաբարձուների խորհրդի նախագահն է, Քաղաքացիական պայմանագիր կուսակցության վարչության անդամ։
Տ․ Ավինյանը հայտարարագրել է մասնավոր կազմակերպություններում մասնակցություն․ նրա կինը՝ Մարիամ Պահլավունին, «Լավ Փրոդաքթս» ընկերության 34 %-ի և «Բարուր Թոյզ» ՍՊԸ-ի 50%-ի բաժնետեր է և տնօրեն։
Մարիամ Պահլավունին ունի RANGE ROVER ավտոմեքենա: «Օրոր Թոյզ» ՍՊԸ-ին (նախքան անվանափոխվելը՝ «Բարուր») 2.8 մլն դրամ փոխառություն է տվել, որից էլ 865 հազար դրամ աշխատավարձ է ստացել։ Նա ունի բանկային 3 ավանդ՝ 44․5 մլն դրամ ծավալով։ Կանխիկ հայտարարագրել է 1․3 մլն դրամ։ Ուշագրավ է, որ հարսին պարտքով գումար են տվել սկեսրայրն ու սկեսուրը՝ Արմեն Ավինյանը և Հասմիկ Խլղաթյանը, համապատասխանաբար՝ 42 մլն դրամ և 4․5 մլն դրամ։
Նկատենք, որ ըստ պետռեգիստրի, Պահլավունին գրանցված է նաև որպես «ՍԱՅԲԵՐ ՎԻԺԸՆ» ՍՊԸ-ի տնօրեն, որի 50 %-ի փայատերը Տիգրան Ավինյանի մայրն է, բայց այդ մասին հայտարարագրում չի նշել։ Մինչ 2018-ի իշխանափոխությունն ընկերությունը ղեկավարում էր Տիգրան Ավինյանը։ Ի դեպ, «ՍԱՅԲԵՐ ՎԻԺԸՆ»-ն այն ընկերությունների ցանկում է, որոնց 2022 թ-ի դեկտեմբերի 1-ին կառավարության որոշմամբ (թիվ 1863-Լ) 10 մլրդ դրամ պետական աջակցություն է տրամադրվել։
Գայանե Խաչատրյան
