Ինչի՞ եք մարդկանց հավաքել ԱԺ-ի մոտ, եթե հանրային ճնշումը բավարար չէ Փաշինյանին հեռացնելու․ սին հույսեր եք տալիս․ Նորայր Նորիկյան․ ՏԵՍԱՆՅՈՒԹ

«Արդար Հայաստան» կուսակցության ղեկավար Նորայր Նորիկյանը, որը մասնակցել էր Բագրատ արքեպիսկոպոս Գալստանյանի հետ քաղաքական ուժերի հանդիպմանը, չի միացել ընդդիմադիր շարժման փողոցային գործողություններին։ Factor TV-ի հետ զրույցում կարծիք է հայտնում, որ Բագրատ արքեպիսկոպոս Գալստանյանի շարժումն օգտագործում են «քաղաքական դիակներ», որոնք ցանկանում են հետ գալ իշխանության։ Կա ևս մեկ պատճառ, թե ինչու ինքը փողոցում չէ․ «Բագրատ սրբազանից ես չեմ լսել քաղաքական խոսք և ծրագիր, թե ինչպես է նա պատկերացնում Հայաստանը Նիկոլ Փաշինյանից հետո, օրինակ՝ ինչպիսի հարաբերություններ է պատկերացնում Արևմուտքի և ՌԴ-ի հետ։ Ես ՀՀ-ի զարգացման գաղափար չեմ տեսնում»։

Նախօրեին Բագրատ Գալստանյանը հայտարարեց, թե մտնում են վճռորոշ փուլ և չորս օրվա ընթացքում պետք է հասնեն կառավարության և վարչապետ Փաշինյանի հեռացմանը՝ պատրաստակամություն հայտնելով քննարկել նաև քաղաքական այլ լուծումներ ևս։ ԱԺ արտահերթ նիստ է հրավիրվել։ ՔՊ-ականները ասում են, որ չեն մասնակցի այդ արտահերթ նիստին և այն կտապալվի։

Նորայր Նորիկյանը կարծում է, որ այս ծրագիրը չի ունենալու արդյունք՝ Փաշինյանի հեռացման տեսքով․ «Բագրատ Սրբազանի շարժումը չունի հաջողություն, քանի որ 30 տարի ՀՀ-ն ապականած ուժերն են փողոցում, որոնք տապալել են ամենը և պատասխանատու են այս ողբերգության համար։ Քոչարյանն ու Սարգսյանը խառնվեցին Փաշինյանին հեռացնելու պրոցեսում, և դրա հետևանքով՝ վարչապետի դիրքերն ավելի են ամրանում»։

ՀՅԴ-ից Արծվիկ Մինասյանն այսօր նշեց, որ հանրային ճնշումը բավարար չէ իմփիչմենթի գործընթացը բարեհաջող ավարտելու համար, որ ՔՊ-ական շրջանակից պատգամավորներ միանան ընդդիմությանը։ Այսինքն, պարոն Մինասյանն արձանագրում է, որ 2018-ի սցենարը այս պահին չեն կարող իրագործել։ Նորայր Նորիկյանն այս հայտարարությանն այսպես է արձագանքում․ «Ինչի՞ եք մարդկանց հավաքել ԱԺ-ի մոտ, եթե հանրային ճնշումը բավարար չէ Փաշինյանին հեռանցելու։ Ուրեմն սին հույսեր եք տալիս, ձեր հույսը Իշխան Զաքարյա՞նն էր, կամ, որ Տարոնը Մարգարյանը կգա՝ հեղափոխությո՞ւն կանի։ Արծվիկ Մինասյանի երազած վարչապետի թեկնածուն Նիկոլ Փաշինյանն է եղել, հիմա ումի՞ց են դժգոհում։ ՀՅԴ-ի և ՀՀԿ-ի թեկնածուն է նա եղել, և հիմա դուք ընդդիմությո՞ւն եք դարձել»։

Հարցազրույցն ամբողջությամբ՝ տեսանյությում։

Ռոբերտ Անանյան