22.04.2026 | 14:37
«Ինտերի» ու «Միլանի» ֆուտբոլիստներն անցնում են մարմնավաճառության հետ կապված աղմկահարույց գործով
ԱՀԿ-ն ողջունում է ՀՀ-ում հակածխախոտային պայքարն ու կոչ անում էլեկտրոնային սիգարետի ոլորտը խստորեն կարգավորել
Հասարակություն
30.08.2018 | 13:34
Առողջապահության համաշխարհային կազմակերպությունն (World Health Organization) աջակցում է ՀՀ-ում իրականացվող հակածխախոտային քաղաքականությանը, որի շրջանակներում օրենքի նոր նախագծի մշակմամբ նոր, առավել լուրջ կարգավորումներ է նախատեսվում. տեղեկացնում է ՀՀ առողջապահության նախարարության լրատվական ծառայությունը:
Այս մասին հայտարարել է Առողջապահության համաշխարհային կազմակերպության Ծխախոտի վերահսկման ծրագրի համակարգող Քրիստինա Մաուեր-Շտենդերը ՀՀ առողջապահության նախարարությանն ուղղված իր նամակով, որում մեծապես կարեւորում է Հայաստանի հստակ քայլերը` միանալու այն արևմտյան պետություններին, որոնք սահմանափակել են թե ավանդական, թե էլեկտրոնային սիգարետների (այդ թվում՝ տաքացնող ծխախոտային արտադրանքների) հանրային օգտագործումն ու գովազդն իրենց բնակչության շրջանում:
Ըստ Առողջապահության համաշխարհային կազմակերպության` «ծխախոտի օգտագործման ԲՈԼՈՐ տարբերակները վնասակար են, այդ թվում նիկոտին մատակարարող էլեկտրոնային համակարգերը (electronic nicotine delivery systems, ENDS) և տաքացվող ծխախոտային արտադրանքը (heated tobacco products, HTPs)»:
Ապացուցողական բժշկության վրա հիմնված պաշտոնական տվյալները փաստում են` մի շարք երկրներում օրեցօր տագնապալի արագությամբ աճում է էլեկտրոնային սիգարետների և տաքացվող ծխախոտային արտադրանքների օգտագործումը պատանիների և երիտասարդների շրջանում: Պատճառը տվյալ ապրանքներն արտադրող ընկերությունների ապակողմնորոշող և մոլորեցնող մարքեթինգային ռազմավարությունն է, որն ակնհայտ նպատակ ունի քողարկելու իր արտադրանքի՝ մարդկանց առողջությանը հասցվող վնասի մասին տեղեկատվությունը:
Առողջապահության համաշխարհային կազմակերպությունը զգուշացնում է էլեկտրոնային ծխախոտի վնասակարության մասին
Հայաստանում ծխախոտի բացասական ազդեցության նվազեցման մասին օրենքի նախագծի մշակման գործընթացը միջազգային հեղինակավոր կազմակերպությունների ուշադրության ներքո է: Այս առումով ԱՀԿ-ն տեղեկացնում է, որ, համաձայն Ծխախոտի դեմ պայքարի ԱՀԿ շրջանակային կոնվենցիայի, տաքացվող ծխախոտային արտադրատեսակները ենթակա են օրենսդրական նույն կարգավորումների, որոնք գործում են բոլոր այլ տեսակի ծխախոտային արտադրատեսակների համար:
ՀՀ առողջապահության նախարարությունն իր հերթին հրավիրում է բոլոր և հատկապես ծխող քաղաքացիների ուշադրությունն այս հիմնախնդրին և կոչ անում տեղեկացված լինել հայաստանյան շուկայում հայտնված այս նոր արտադրանքների վնասակարության մասին:
