Կառավարությունը հարկային արտոնություն տվեց «ԱՐՄՕՅԼ» ընկերությանը․ տեսչական մարմինն այս անգամ այլ եզրակացություն է ներկայացրել․ ՏԵՍԱՆՅՈՒԹ

Տնտեսական զարգացման և ներդրումների նախարար Արծվիկ Մինասյանն այսօր գործադիրի հավանությանը ներկայացրեց որոշման նախագիծ, որով առաջարկվում էր «Ներդրումային ծրագրի շրջանակներում «ԱՐՄՕՅԼ» փակ բաժնետիրական ընկերու­թյան կողմից ապրանքների ներմուծման դեպքում մաքսային և հարկային մարմինների կողմից հաշվարկված ավելացված արժեքի հարկի գումարների վճարման ժամկետը երեք տարի ժամկետով հետաձգել։ 

Նախարար Մինասյանը նշեց, որ տեսչական մարմինը ևս մեկ անգամ է ուսումնասիրել այս ընկերության կողմից ներկայացված փաստաթղթերը և հերքել նախորդ անգամ շրջակա միջավայրի վրա ազդեցության վրա փորձաքննության վերաբերյալ տրված եզրակացությունը։ 

Նախարարը նկատեց, որ շրջակա միջավայրի վրա ազդեցության փորձաքննությունն անպայման պետք է իրականացնի, ինքն առաջինն է այն պնդում, սակայն տեսչական մարմինը օրենքում առկա ոչ հստակ ձևակերպումը չպետք է դարձնի պատճառ ընկերությանը գործունեությունը խոչընդոտելու համար։ 

Վարչապետ Նիկոլ Փաշինյանն էլ նկատեց, որ Տնտեսական զարգացման և ներդրումների  և Բնապահպանության նախարարություներնն էլ համատեղ պետք է աշխատեն օրնեքում առկա ոչ հստակ ձևակերպումները հստակեցնելու համար։

Հիշեցնենք, որ այս ընկերությանը հարկային արտոնություն տալու մասին հարցը Կառավարությունը քննել է նաև նախորդ շաբաթ, բայց քանի որ այն ժամանակ տեսչական մարմինը տվել էր բացասական եզրակացություն, Նիկոլ Փաշինյանն առաջարկեց նախագծի ուսումնասիրությունը հետաձգել։

Մանրամասները՝տեսանյութում։