Վրաստանի վարչապետը Գերմանիայի դեսպանին մեղադրել է շահարկումների մեջ

Վրաստանի վարչապետ Իրակլի Կոբախիձեն երկրում Գերմանիայի դեսպանին մեղադրել է շահարկումների մեջ, հայտնում է վրացական «Առաջին ալիքը»։

«Շատ տխուր է, երբ Գերմանիայի դեսպանը, այն անձը, ում անվանում են Գերմանիայի դեսպան, չի դադարեցնում շահարկումները։ Բոլորդ հիշում եք, որ ժամանակին նա ներգրավված է եղել «Լելո»-ի նախընտրական գործունեությանը, նրանք մեկնել են Բոլնիսի, որտեղ համատեղ մասնակցել են քաղաքական կոնկրետ միջոցառման։ Մենք տեսանք, որ որոշ հեռուստաալիքներ օգտագործեցին Գերմանիայի դեսպանի հայտարարությունը ապատեղեկատվություն տարածելու համար, այն ներկայացրեցին, թե, իբր, Գերմանիայի կանցլերը խոսում է Վրաստանում տիրող իրավիճակի մասին, մինչդեռ, եթե չեմ սխալվում, նա խոսում էր Գերմանիայում 5 տարի առաջ տեղի ունեցած սպանության մասին։ Շատ տխուր է, երբ նախ Գերմանիայի դեսպանն է միտումնավոր ապատեղեկատվության աղբյուր տրամադրում կոնկրետ լրատվամիջոցներին, իսկ հետո լրատվամիջոցներն օգտվում են դրանից։ Սա տխուր իրադարձություն է, թեև սա մեր խնդիրը չէ, սա գերմանական պետության խնդիրն է, երբ նրա դեսպանը, պաշտոնական ներկայացուցիչն առանձնանում է նման անլուրջ արարքներով»,- ասել է Իրակլի Կոբախիձեն։

Ըստ վրացական հեռուստաալիքի հրապարակման՝ կանցլեր Օլաֆ Շոլցը դատապարտել է բռնությունը Գերմանիայում, որի մասին նա մայիսի 3-ին հայտարարել է. «Քաղաքական դրտապատճառներով թշնամանքն ու հարձակումներն ուժեղանում են, մենք անհանդուրժող ենք ատելության և բռնության նկատմամբ։ Մարդկանց մեծ մասն արժանի է, և նրանց ձայնը պետք է լսելի լինի»:

Շոլցի հայտարարությունը X սոցիալական հարթակում տարածել է նաև Վրաստանում Գերմանիայի դեսպան Պիտեր Ֆիշերը՝ չնշելով, որ կանցլերի մեջբերումը վերաբերում է Գերմանիային։