Քաղաքականություն
03.06.2024 | 13:55
Թուրքիայի ոստիկանությունը նախօրեին ռեյդեր է իրականացրել մի քանի բնակարաններում և ձերբակալել ադրբեջանական նավթագազային պետական SOCAR ընկերության Ստամբուլի գրասենյակի դիմաց բողոքի ակցիայի մասնակիցներին։ Այս մասին հայտնում է «Հազար երիտասարդներ Պաղեստինի համար» խումբը X-ում գրառմամբ։
«Մեր ընկերներից 13-ը ձերբակալվել են, քանի որ նրանք անցել են Պաղեստինի կողմը՝ ասելով, որ Գազային հարվածող ինքնաթիռների վառելիքը չպետք է տեղափոխվի մեր երկրից։ Էրդողան, թեև միակ իրական աջակցությունը, որ կարող եք տալ Պաղեստինին, դա օկուպանտին մեկուսացնելն է և այս արյունալի առևտրին վերջ տալը, սակայն մեր նավահանգիստներից նավթը դեռևս հոսում է սիոնիստներին»,- ասվում է գրառման մեջ։
Ի սկզբանե ոստիկանությունը ձերբակալել է բողոքի ակցիայի 10 մասնակցի, այնուհետև ձերբակալվածների թիվը հասել է 13-ի։
Խումբը մայիսի 31-ին բողոքի ցույց էր անցկացրել ադրբեջանական SOCAR ընկերության Ստամբուլի գրասենյակի մոտ՝ պահանջելով դադարեցնել նավթի մատակարարումները Իսրայել։
Ցուցարարները կարմիր ներկ էին լցրել գրասենյակի շենքի մուտքի մոտ՝ վանկարկելով «Մենք թույլ չենք տա այս հողերի ռեսուրսներով աջակցել ցեղասպանությանը»:
Խմբի անդամներն այսօր ևս պատրաստվում են բողոքի ցույց անցկացնել։
Էմմա Չոբանյան
