Կրեմլը Սամվել Կարապետյանի բերանով ՀՀ-ին ասաց՝ մտքովդ չանցնի՝ անկախ քաղաքականություն վարես, ՌԴ-ից ես կախված․ Էդգար Խաչատրյան.ՏԵՍԱՆՅՈՒԹ

Ընդդիմադիր քաղաքական ուժերը Բագրատ Արքեպիսկոպոս Գալստանյանի գլխավորությամբ, այսօր շարունակել են բողոքի ակցիաները Նիկոլ Փաշինյանի հրաժարականի պահանջով։ Կառավարության բակում Բագրատ արքեպիսկոպոսը հայտարարել էր, թե իշխանությունը գուցե դիտմամբ է արել Լոռու մարզի ջրհեղեղը, որ փողեր ստանա ինչ-որ տեղից։

«Արդեն պարզվել է, թե ինչպես էր հնարավոր հեղեղը կանխել, բայց այս մարդիկ ո՛չ գիտնականների հետ են խոսում, ո՛չ մասնագետների, և ամեն ինչ թողնված է բարձիթողի վիճակում։ Մեղք չվերցնեմ ինձ վրա, բայց գուցե դիտմամբ են արել՝ ցույցը կանխելու համար կամ գուցե փողեր կան ինչ-որ տեղից ստանալու։ Վարկած է։ Կրկնում եմ, մեղք չվերցնեմ ինձ վրա, բայց վարկածներն ապրելու իրավունք ունենք։ Ես խոսել եմ գիտնականների հետ, որոնք ասել են, թե ինչ միջոցներ պետք է ձեռնարկվեին։ Ասելիքս այն է, որ այս մարիկ ոչնչից ո՛չ հասկանում են, ո՛չ էլ որևէ մեկին հարցնում են, հետևաբար աղետն իրենք են»,- նշեց Բագրատ Գալստանյանը։ Միաժամանակ, քաղաքական դաշտում չեն դադարում այն քննարկումները, թե ինչքանով է նրա ղեկավարած շարժումը փոխկապակցված Ռուսաստանին և Հայաստանի նախկին նախագահներ Ռոբերտ Քոչարյանին և Սերժ Սարգսյանին։ «Խաղաղության երկխոսություն» ՀԿ ղեկավար, իրավապաշտպան Էդգար Խաչատրյանը Factor TV-ի հետ զրույցում ասում է, որ իր ընկալմամբ՝ այդ կապերն ակնհայտ են․

«Այս ցույցերը ՌԴ-ի վերջին ճիգերն են՝ ՀՀ-ն ազդեցության տակ պահելու նպատակով։ Ռուսաստանը ռեսուրս է ծախսում, բայց արդյունքի չի հասնում, և մենք՝ որպես Հայաստան պետություն, պիտի չեզոքացնենք ռուսական իմպերիալիզմի վտանգը մեր նկատմամբ։ Ռոբերտ Քոչարյանն ու ռուսներն են խոսել, որ ընդդիմությանը կարող է առաջնորդել եկեղեցական, և տրվել է Բագրատ արքեպիսկոսի անունը։ ՌԴ-ի կապը այս շարժման հետ ակնհայտ է՝ ռուս պրոպագանդիստներն աջակցում են, կոչ են անում փողոց դուրս գալ»։

Ըստ Խաչատրյանի՝ խնդիրը Փաշինյանը չէ, այլ՝ Հայաստան պետության լինել-չլինելու հարցն է դրված, քանի որ ըստ նրա՝ ՌԴ-ն ձգտում է ՀՀ-ին պահել իր ազդեցության գոտում, ծայրագավառ դարձնել։

Հարցազրույցն ամբողջությամբ՝ տեսանյութում։

Ռոբերտ Անանյան