Թուրքիայում սրճարանի սեփականատիրոջը ձերբակալել են քրդերենով ծառայությունների մատուցման համար

Թուրքիայի Դիարբեքիր նահանգում սրճարանի սեփականատերը ձերբակալվել է սրճարանում միայն քրդերենով ծառայություններ մատուցելու համար, գրում են թուրքական լրատվամիջոցները։

Pine սրճարանի սեփականատեր Ռամազան Շիմշեքը ձերբակալվել է սրճարանի խուզարկությունից հետո։ Շիմշեքը սոցիալական ցանցերում տարածված տեսանյութում հայտարարել էր, որ իր սրճարանում սպասարկումը միայն քրդերենով է առաջարկվելու։ Նա նշել էր, որ որոշել է խթանել քրդերենի օգտագործումը, որը լայնորեն տարածված է Թուրքիայի հարավարևելքի քրդաբնակ շրջաններում:

Սրճարանի աշխատակիցները քրդերենով սկսել են շփվել հաճախորդների հետ մայիսի 15-ին, որը նշվում է որպես քրդերենի օր։

Շիշեքը լրատվամիջոցներն ասել է, որ հաճախորդներն ազատ են խոսելու ինչ լեզվով ուզում են, սակայն սրճարանի աշխատակիցները պատասխանում են միայն քրդերեն: Նա նշել է, որ իրենք թուրքալեզու հաճախորդներին նույնպես ողջունում են սրճարանում և բայց առաջարկել է,  նախքան այցելությունը քրդերեն սովորել: Դրանից հետո սոցիալական ցանցերում Շիմշեքին սկսել են քննադատել։

Նրա ձերբակալությունը տեղի է ունեցել Դիարբեքիրի ոստիկանություն ուղարկած մի քանի ծանուցումներից հետո։

Հասարակական-քաղաքական դաշտի հետազոտությունների կենտրոնի վերջին զեկույցը ցույց է տվել, որ Թուրքիայի քուրդ բնակչության կեսից ավելին քրդերենի փոխարեն տանը շփվելու համար օգտագործում է թուրքերեն:ը Այնուամենայնիվ, գրեթե բոլոր հարցվողները ցանկություն են հայտնել, որ լեզուն պահպանվի և իրենց երեխաները կրթվեն մայրենի լեզվով:

Հիշեցնենք՝ Թուրքիայի  սահմանադրությունը թուրքերենն է  ահմանում է որպես միակ պաշտոնական լեզու:

Էմմա Չոբանյան